بەم زووانە.. چاوەڕێی سروودی "بەڵێ بۆ ریفراندۆم" بن

وێڕای بەردەوامیی چالاكییە هونەرییەكان لەبارەی ریفراندۆم بۆ سەربەخۆیی كوردستان كە بڕیارە لە 25ی ئەیلوول بەڕێوە بچێت. ژمارەیەك لە هونەرمەندان لە هەولێر سروودێكی پڕۆفیشناڵیان تۆمار و كلیپ كردووە و بڕیارە بەم زووانە لە كەناڵی رووداو بێتە وەشان.

لەوبارەیەوە هونەرمەند لالۆ رەنجدەر كە یەك لەو هونەرمەندانەیە بەشداریی لەو سروودە كردووە و بە "وشە"ی گوت، ئەو سروودەی تۆمارمان كردووە بەناوی "بەڵێ بۆ ریفراندۆم"ە، لە هۆنراوەی مامۆستا ئەحمەد سالاری هونەرمەندە و هونەرمەند چەتۆ نەورۆز میلۆدی و دابەشكردنی موزیكی بۆ كردووە.

لالۆ روونی كردەوە، ئێمە لەرووی دەنگەوە هونەرمەندان لالۆ رەنجدەر، پەرواز حوسێن و گۆران، عەباس هەركی، دانا عەبدولجەبار بەشداریمان تێدا كردووە كە هەریەكەمان كۆپلەی خۆی دەبێت بۆ گوتن. ئەو سروودە لە ستۆدیۆی "سۆڵۆ" لە هەولێر هاتووەتە تۆماركردن و هونەرمەند هۆگر عەزیز میكس و سكوێسنەری بۆ كردووە.

لەبارەی كلیپەكەیشەوە لالۆ گوتی، كلیپەكە لەلایەن كەناڵی رووداوەوە ئەنجام دراوە كە لە هۆڵی میدیا سەنتەر لە هەولێر كاری بۆ كراوە، لە دەرهێنانی هۆزان حەكیمە و وێنەگران هونەر بەكر مەعرووف، دڵشاد حوسێن و كارزان یوسف وێنەیان گرتووە. ئێستە بەرهەمەكە لە قۆناغی مۆنتاجدایە و لەگەڵ تەواوبوونی، دێتە وەشان.