چوار ڕووداوی جیاواز پێنج هاووڵاتی لە سلێمانی دەبنە قوربانی


لە چوار ڕووداوی جیاواز لە پارێزگای سلێَمانی، پێنج هاووڵاتی دەبنە قوربانی و پۆلیسیش دەڵێت پێشبڕكێی دوو ئۆتۆمبێل دوو منداڵی كوشتووە.

ئەمڕۆ یەكشەم 11ـی ئەیلوول/ سێپتێمبەر، پۆلیسی دەڤەری پشدەر بڵاوی كردووەتەوە، ئێوارەی دوێنێ‌ لە ئەنجامی پێشبڕكێیەكی دوو ئۆتۆمبێل لە گەڕەكی ڕاپەڕینی شارۆكەی قەڵادزێ‌، دوو منداڵ دەكەونە ژێر ئۆتۆمبێلەكان و گیان لە دەست دەدەن كە تەمەنیان پێنج ساڵ و شەش ساڵە.

پۆلیسی ڕاپەڕین دەڵێت، لەو ڕووداوە هەردوو شوفێرەكە گیراون و دۆسیەی لێكۆڵینەوە كراوەتەوە و دانیان ناوە بەوەی كە پێشبڕكێیان كردووە و كۆنتڕۆڵی ئۆتۆمبێلەكانیان لە دەست داوە.

پۆلیسی سلێمانی بڵاوی كردووەتەوە، لە ئەنجامی ڕووخانی خانوویەك لە گەڕەكی ئەلبانەكانی بەكرەجۆ لە شاری سلێمانی، منداڵێكی تەمەن چوار ساڵان گیانی لە دەست دا و یەكێكی تریش بریندارە، هەر شەوی رابردو لە شاخی گۆیژە كوڕێك كوژراوە كە لەگەڵ خۆشەویستەكەی بووە.

پۆلیس بڵاوی كردووەتەوە كە بەرەبەیانی ئەمڕۆ، ئۆتۆمبێلێكی جۆری تاكسی خۆی بە هاووڵاتییەك دەكێشێت و گیان لە دەست دەدات، شوفێرەكە گیراوە و دۆسیەی لێكۆڵینەوە بۆ ڕووداوەكە كراوەتەوە.



وشە - رامیار جەواد


AM:10:50:11/09/2017




ئه‌م بابه‌ته 683 جار خوێنراوه‌ته‌وه‌‌