ریال مەدرید گرێبەست لەگەڵ ئەم هێرشبەرە نوێیە دەكات

یانەی ریال مەدریدی ئیسپانی چاودێری هێرشبەری لاوی ئەڵمانی تیمۆ ڤێرنەر لە یانەی لایپزیگ لە خولی ئەڵمانیا دەكات و پلانی گرێبەستكردنی لە ماوەی گواستنەوەی زستانەی داهاتوودا بۆ دادەڕێژێ.

رۆژنامەكانی ئیسپانیا بڵاویان كردەوە: یانەی ریال مەدرید چەندان نێردراوی ناردووەتە ئەڵمانیا بۆ ئەوەی لە نزیكەوە چاودێری تیمۆ بكەن و لە تواناكانی دڵنیا ببنەوە.

یانەكە پێیوایە بۆ گرێبەستكردن لەگەڵ تیمۆی تەمەن 21 ساڵ لە ماوەی گواستنەوەی زستانەی داهاتوودا بڕی 50 ملیۆن یۆرۆی پێویستە.

ئەمە لە كاتێكدایە كە یانەكە بۆ وەرزی نوێ گرێبەستی لەگەڵ هیچ هێرشبەرێك نەكردبوو سەرەڕای ئەوەی دوو هێرشبەری تیپەكەی فرۆشتبوو كە ئەوانیش ئەلڤارۆ مۆراتا و ماریانۆ دیاز بوون، هەروەها لە یارییەكانی رابردووشیدا ئاستی هەردوو هێرشبەرەكەی كەریم بەنزیما و گاریس بێڵ بەتەواوی دابەزیبوو و ببووە جێگەی رەخنەی بەرپرسان و هاندەرانی یانەكە.

تیمۆ وەرزی رابردوو لەگەڵ یانەی لایپزیگ ئاستێكی ناوازەی پێشكەش كرد و توانی 21 گۆڵ بۆ یانەكە تۆمار بكات، لەم وەرزەشدا دوای ئەنجامدانی 3 یاریی تا ئێستا 3 گۆڵی بۆ یانەكەی تۆمار كردووە.



وشە - ئامانج ئه‌كره‌م


AM:11:31:12/09/2017




ئه‌م بابه‌ته 340 جار خوێنراوه‌ته‌وه‌‌