تا ئێستە یەكێتی سەرۆكی قەوارەكەی لە كۆمسیۆن یەكلای نەكردووەتەوە
یەكێتی نیشتمانی كوردستان تا ئێستە سەرقاڵی دیاریكردنی كەسێكە، كە ببێتە سەرۆكی قەوارەی یەكێتی بۆ هەڵبژاردنەكانی داهاتووی هەرێمی كوردستان و لە كۆمسیۆنی باڵای هەڵبژاردن و ڕاپرسی پەسەند بكرێت.
سەرچاوەیەك لە مەكتەبی هەڵبژاردنی یەكێتی نیشتمانی كوردستان بە "وشە"ی ڕاگەیاند، تا ئێستە یەكێتی هیچ كەسێكی وەك سەرۆكی قەوارەكەی دیاری نەكردووە و ئێستە سەرقاڵی ئەوەیە كەسێك دیاری بكرێت لەلایەن مەكتەبی سیاسیی حیزبەكەوە، لە كاتێكدا بەپێی مەرجەكانی كۆمسیۆنی باڵای هەڵبژاردن و ڕاپرسی هەرێمی كوردستان لە كاتی پێشكەشكردنی مامەڵەی تۆماركردنی قەوارە دەبێت كەسێك وەك سەرۆكی قەوارەكە دیاری كرابێت و هەر ئەوكەسەش لە بری قەوارەكە واژووی لیستی داهاتووی حزبەكە دەكات.
لەمبارەیەوە ڕزگار عەلی ئەندامی مەكتەبی سیاسیی یەكێتی بە "وشە"ی ڕاگەیاند، ئەوان ئاگەداری وردەكاری و چۆنییەتی لیستی هەڵبژاردنی یەكێتی نین و ئەو پرسە پێوەندی بە مەكتەبی هەڵبژاردنەكانیانەوە هەیە.
ڕزگار عەلی دووپاتی كردەوە، كە لیستییان بۆ هەڵبژاردنی داهاتوو دەبێت و قەوارەكەیان لە كۆمسیۆنی باڵای هەڵبژاردن و ڕاپرسی تۆمار دەكەن.
"وشە" بۆ وەرگرتنی زانیاری پێوەندی بە شۆرش ئیسماعیل بەرپرسی مەكتەبی هەڵبژاردنی یەكێتی نیشتمانی كوردستان كرد، بەڵام ئامادە نەبوو وەڵامی ئەم پرسیارە بداتەوە.
بەپێی بڕیاری كۆمسیۆنی باڵای هەڵبژاردن و ڕاپرسی هەرێمی كوردستان وادەی تۆماركردنی ناوی قەوارە سیاسییەكان بۆ هەڵبژاردنی داهاتوو تا 28ی ئەیلوول بەردەوام دەبێت.
وشە -
تایبه‌ت