دەنگی بەڵێ بۆ سەربەخۆيی كوردستان 92.73% بەدەست هێنا
دوای بەڕێوەچوونی پڕۆسەی ریفراندۆم بۆ سەربەخۆیی هەرێمی كوردستان لە 25ی ئەیلوول، كۆمسیۆنی باڵای هەڵبژاردن و ڕاپرسی هەرێمی كوردستان ئەنجامە فەرمی بەراییەكانی پڕۆسەكە و موژدەی سەركەوتنی ڕیفراندۆمی سەربەخۆیی كوردستان ڕاگەیاند.
ئێوارەی ئەمڕۆ چوارشەم 27ی ئەیلوول، هەندرێن محەمەد سەرۆكی كۆمسیۆنی باڵای هەڵبژاردن و ڕاپرسی لە هەرێمی كوردستان كۆنگرەیەكی ڕۆژنامەوانی ئەنجام دا و ڕای گەیاند، موژدەی سەركەوتنی راپرسی سەربەخۆیی كوردستان ڕادەگەیەنین.
زیاتر گوتی، دوای ئەوەی كۆمسیۆن راسپێردرا و كۆمسیۆن بەرپرسیارییەتێكی مێژوویی گرتووەتە ئەستۆی و لە ماوەیەكی كورتدا توانی تەواوی ئامادەكارییەكان رێك بخات.
ڕوونی كردەوە كە دڵنیام ئەنجامدانی پڕۆسەیەكی وا لە هەڵە و كەموكورتی بەدەر نییە، بەڵام بە پێی ڕاپۆرتی چاودێرەكان بێت پرۆسەكە بە گونجاوی بەڕێوە چووە.
هاوكات كۆمسیۆنی هەڵبژاردن و ڕاپرسی هەرێمی كوردستان ئەنجامە بەراییەكانی ریفراندۆمی سەربەخۆیی كوردستانی بڵاو كردەوە كە بەم شێوەیەیە:
كۆی ژمارەی تەواوی دەنگدەرانی كوردستان و ناوچە دابڕێنراوەكان و ئەوروپا بریتییە لە چوار ملیۆن و 581 هەزار و 225 دەنگ و لەو ڕێژەیە سێ ملیۆن و 305 هەزار و 925 كەس دەنگی داوە، كە دەكاتە 72.16% كە دەنگ دراوە.
هاوكات كۆمسیۆن رای گەیاند كە ژمارەی دەنگی "بەڵێ" بۆ سەربەخۆیی كوردستان بریتی بووە لە دوو ملیۆن و 861 هەزار و 471، كە دەكاتە 92.73%ی دەنگەكان.
هاوكات ژمارەی دەنگی "نەخێر" بریتی بووە لە 224 هەزار و 468 دەنگ كە دەكاتە 7.27%.
وشە -
سه‌رخێڵ هاشم