بەهۆی كاریگەریی نزمە پاڵەپەستۆیەكی دەریای ناوەڕاست، كۆتای هەفتەی داهاتوو شەپۆلێكی باران هەرێمی كوردستان دەگرێتەوە .
دەزگەی كەشناسی جیهانی لە بڵاوكراوەی مانگانەی خۆی ڕای دەگەیەنێت كە هەفتەی داهاتوو لە ڕۆژی چوارشەمەوە شەپۆلێكی باران هەرێمی كوردستان دەگرێتەوە، كە سێ رۆژ بەردەوام دەبێت و پلەكانی گەرماش نزم دبنەوە.
دەزگەی كەشناسی ڕوونی كردووەتەوە كە شەپۆڵەكە لە رۆژی یەكەمدا هەورە برووسكەشی لەگەڵ دەبێت و پلەی گەرمیش دادەبەزێت بۆ ١٧ پلەی سیلیزی و شەوانەش تا پێنج پلە سەرووی سفر نزم دەبێتەوە.
بەگوتەی دەزگاكە هەفتەی دواتریش شەپۆلێكی تری باران لەهەمان ڕۆژدا هەرێمی كوردستان دەگرێتەوە و پلەكانی گەرمیش زیاتر نزم دەبنەوە.
پێویستە بگوترێت ئەمساڵ بە پێچەوانەی ساڵی رابردوو كە زووتر باران لە كوردستان دەستی پێ كرد، بارینی باران دوا كەوتووە و ئەو شەپۆلەش كە هەفتەی رابرودوو كوردستانی گرتەوە بڕە بارانێكی زۆری لێ نەكەوتەوە.
بارین لە وەرزی پایزدا جگە لە بەرزكردنەوەی ئاستی سامانی ئاوی كوردستان، بۆ مەبەستی كشتوكاڵ و ئامادەكردنی زەویش بۆ چاندن بەسوودە.
وشە / رامیار جەواد