به‌غدا بۆ گفتوگۆ ئاماده‌ نییه‌ و ده‌یه‌وێ كۆمه‌ڵگه‌ی نێوده‌وڵه‌تی هه‌ڵخه‌ڵه‌تێنێ


دوای رێوشوێنی سزای ئابووری به‌پاساوی پرۆسه‌ی ریفراندۆم، حكوومه‌تی عێراق له‌ 16ی تشرینی یه‌كه‌م/ئۆكتۆبه‌ر جموجۆڵی سه‌ربازی ده‌ست پێكرد و كه‌ركووك و ناوچه‌ كوردستانییه‌ دابڕاوه‌كانی داگیر كرد. به‌ڵام په‌رله‌مانتاران هێشتا نیازخراپی عێراق ده‌بینن و عه‌ره‌به‌كانیش دڵنیایی ده‌ده‌ن كه‌ دۆخه‌كه‌ ئاسایی ده‌بێته‌وه‌.

مونازڵ مووسه‌وی په‌رله‌مانتاری عێراق له‌ فراكسیۆنی ئه‌حڕاڕ،به‌"وشه‌"ی راگه‌یاند، هه‌وڵ بۆ چاره‌سه‌ركردنی دۆخه‌كه‌ هه‌یه‌، چونكه‌ ناتوانرێت ده‌ستبه‌رداری هه‌ولێر و هه‌رێمی كوردستان بین و ئێسته‌یش دۆخه‌كه‌ به‌ره‌و چاره‌سه‌رییه‌، كورد هه‌ر به‌شێكی ره‌سه‌نی عێراقن و خاوه‌نی چه‌ندان كه‌سایه‌تیی نیشتمانی و خاوه‌ن توانان.

زیاتر گوتی، دۆخه‌كه‌ له‌گه‌ڵ هه‌رێمی كوردستان به‌ره‌و چاره‌سه‌رییه‌ و هه‌رێمیش وه‌ك به‌شێك له‌ عێراق ده‌مێنێته‌وه‌، بۆیه‌ هیچ گۆڕانكارییه‌ك له‌ دیدی به‌غدا بۆ كورد رووی نه‌داوه‌، ئه‌وان بوونی خۆیان له‌ناو په‌رله‌مان و حكوومه‌ت وه‌ك خۆیه‌تی،هه‌رێم ده‌سه‌ڵاتی خۆی ده‌بێت و به‌غداش هی خۆی، پرسه‌كانی پێوه‌ندییه‌كانی ده‌ره‌وه‌ و به‌رگری و دارایی و سنووره‌كان له‌ ده‌سه‌ڵاتی راسته‌وخۆی ناوه‌ندن، ده‌كرێ ئه‌و دامه‌زراوانه‌ سه‌ربه‌ ناوه‌ند بن، به‌ڵام كارمه‌ندانی كورد بن له‌ خه‌ڵكی هه‌رێم، به‌ڵام ئه‌وانه‌ سه‌ربه‌ به‌غدا ده‌بن.

له‌ به‌رامبه‌ردا كورد تا ئێسته‌ سه‌یری ئه‌و هێزه‌ سه‌ربازییانه‌ ده‌كات كه‌ له‌ نزیك سنووره‌كانی هه‌رێم كۆ كراونه‌ته‌وه‌ و ئه‌و رێوشوێنه‌ ئابوورییانه‌ی له‌به‌رامبه‌ری وه‌رگیراون به‌ كۆنترۆڵكردنی بیره‌ نه‌وت و ده‌روازه‌ سنوورییه‌كان و داخستنی فڕۆكه‌خانه‌كانی و ره‌شبینانه‌ دۆخه‌كه‌ وه‌سف ده‌كات.

موسه‌نا ئه‌مین په‌رله‌مانتاری كورد له‌ به‌غدا، بۆ "وشه‌" رای گه‌یاند، پێش ریفراندۆم سه‌نگی كورد له‌ به‌غدا لاواز بووبوو و دابڕان رووی دابوو، دوای ریفراندۆمیش كێشه‌كان قووڵتر بوونه‌وه‌ و پێگه‌ی كورد له‌ جاران لاوازتر بوو، ئێسته‌ كورد وه‌ك لایه‌نێكی نه‌یار سه‌یر ده‌كرێت نه‌ك هاوبه‌شێكی سیاسی.

"ئه‌وه‌ وای كردووه‌ گفتوگۆكان سه‌خت بن، پێش ئه‌و هێرشه‌ سه‌ربازییه‌ عێراق بۆ گفتوگۆمه‌رجی هه‌ڵوه‌شاندنه‌وه‌ی ریفراندۆمی هه‌بوو، ئێسته‌یش گفتوگۆی قبووڵ نه‌كردووه‌ و ده‌یه‌وێت یه‌ك له‌دوای یه‌ك كارته‌كانی به‌كار بێنێت و پێگه‌ی وتوێژی كورد لاواز بكات" ئه‌مین وای گوت.

ئاماژه‌ی به‌وه‌یش دا كه‌ به‌غدا راستگۆ نییه‌ كه‌ ده‌ڵێت ئاماده‌ین بۆ گفتوگۆ، ته‌نیا له‌به‌رئه‌وه‌یه‌ رای گشتیی نێوده‌وڵه‌تی له‌خۆی رازی بكات، ئه‌گه‌رنا هیچ ئاماده‌یییه‌كی تیادا نییه‌ بۆ گفتوگۆ، بۆیه‌ ئه‌وان تا پێیان بكرێت پاڵه‌په‌ستۆ ده‌كه‌ن تا ناچار ده‌بن له‌ژێر پاڵه‌په‌ستۆیه‌كی نێوده‌وڵه‌تی بوه‌ستن، بۆئه‌وه‌ی كورد له‌ لاوازترین پێگه‌وه‌ قسه‌یان له‌گه‌ڵدا بكات.

ئه‌و په‌رله‌مانتاره‌ كورده‌ ده‌ڵێت ره‌نگه‌ ئه‌مه‌ریكا رێ نه‌دا كورد شكست بێنێت و رێ نه‌دا بێنه‌ سه‌ر هه‌ولێر و سلێمانی وروونی كرده‌وه‌"جگه‌ له‌ رێوشوێنه‌كانی له‌دژی حكوومه‌تی هه‌رێم، به‌غدا كار له‌سه‌ر دابه‌شبوونی هه‌رێم و ده‌نگی ناوخۆی كورد ده‌كاتو هه‌وڵی گۆڕینی دیمۆگرافیای كه‌ركووك ده‌دات، به‌ ئاراسته‌ی ته‌عریبكردن و گۆڕینی تایفی و به‌شیعه‌كردنی ناوچه‌كه‌". 

له‌ به‌رامبه‌ردا تاریق حه‌رب شاره‌زای یاسایی عێراق،به‌"وشه‌"ی راگه‌یاند، كورد سه‌نگی خۆی له‌ به‌غدا وه‌ك هاوبه‌شێك له‌ پرۆسه‌ی سیاسی له‌ده‌ست نه‌داوه‌، ئه‌وه‌ی له‌ 16ی ئۆكتۆبه‌ر رووی دا دۆخه‌كه‌ی بۆ به‌غدا راست كرده‌وه‌، ئه‌وه‌ی رووی دا براوه‌ و دۆڕاوی تیادا نه‌بوو، واته‌ نه‌ به‌غدا بردییه‌وه‌ و نه‌ هه‌ولێر دۆڕاندی، بۆیه‌ بنه‌ماكانی وتوێژی هه‌ولێر و به‌غدا هیچ گۆڕانكارییه‌كی به‌سه‌ردا نه‌هاتووه‌.

زیاتر گوتی، ئه‌و رێوشوێنانه‌ی به‌غدا له‌دژی هه‌ولێر وه‌ریگرت كاتییه‌، سبه‌ی كه‌ هه‌ڵبژاردن ده‌كرێت، عه‌ره‌ب و توركمان ده‌توانن ده‌نگی كورد كه‌م بكه‌نه‌وه‌؟ نه‌خێر، بۆیه‌ ئه‌وه‌ی روو ده‌دات كاتییه‌ و كاره‌كان بۆ گه‌ل ده‌گه‌ڕێته‌وه‌ و ئه‌و بڕیار ده‌دات.

حه‌رب ده‌ڵێ، ئاخۆ كێشه‌ چییه‌ ئه‌گه‌ر دوو فه‌رمانبه‌ری گومرگ و دوو پۆلیس و دوو كارمه‌ندی ته‌ناهی له‌ فڕۆكه‌خانه‌ی به‌غدا بوونیان هه‌بێت؟، بۆیه‌ ئه‌و كێشه‌ بچووكانه‌ پێویسته‌ تێپه‌ڕ بكرێن، دواتر توركیا و ئێران و ئه‌مه‌ریكاش داوای وتوێژی به‌غدا له‌گه‌ڵ هه‌رێمی كوردستان ده‌كه‌ن.دووپاتی كرده‌وه‌، دوای كۆنترۆڵكردنی ناوچه‌ كێشه‌له‌سه‌ره‌كان شتی تر روو نادات، بۆیه‌ زمانی هه‌ڕه‌شه‌ی ئێران و توركیاش له‌ به‌رامبه‌ر هه‌رێمی كوردستان لاوازتر بووه‌.

"كاته‌ سه‌خته‌كه‌ كۆتای پێ هات و ئێسته‌ شه‌ڕ نه‌ماوه‌ و ئه‌وه‌ی رووی دا دۆخێكی فریاگوزاری بوو و نه‌ به‌غدا و نه‌ هه‌ولێر جه‌نگیان ناوێت، ئه‌وه‌ی ده‌مێنێته‌وه‌ جه‌نگی ئابوورییه‌، بۆیه‌ پێویسته‌ ئه‌و لایه‌نه‌ رێك بخرێته‌وه‌، هه‌رێم هه‌ر خاوه‌ن سه‌قامگیری و سیاسه‌ت و قه‌واره‌ی خۆی ده‌بێت" حه‌رب وای گوت.


وشە - مه‌حموود ئیسماعیل


PM:12:17:11/11/2017




ئه‌م بابه‌ته 11619 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌