مەسروور بارزانی راوێژكاری ئەنجوومەنی ئاسایشی هەرێمی كوردستان پێشوازیی لە برێت مەكگورك نێردەی تایبەتی سەرۆكی ئەمەریكا بۆ هاوپەیمانیی نێودەوڵەتی جەنگی دژ بە داعش كرد.
لە دیدارەكەدا برێت مەكگۆرك رای گەیاند، كە ئەمەریكا هەرجۆرە پەنا بردنێك بۆ كرداری سەربازی لە یەكلاكردنەوەی كێشەكان رەتدەكاتەوە و هەموو هەوڵ و تواناكانیشی دەخاتە گەڕ بۆ ئەوەی گرژییەكان بڕەوێنرێنەوە و هەردوولا دەست بە گفتوگۆ بكەن بۆ ئەوەی بە شێوازێكی ئاشتیانە و لە سەر بنەمای دەستوور كێشەكانیان چارەسەر بكەن.
نێردەی تایبەتی ئەمەریكا بۆ شەڕی دژی داعش دەڵێت، وڵاتەكەی لە پاڵپشتیی حكوومەتی هەرێمی كوردستان وەك كیانێكی دەستووری دووپات دەكاتەوە و خوازیارن هەرێمی كوردستان بە یەكگرتوویی و بە هێزەوە لە چوارچێوەی دەستوور لە گشت بوارەكاندا لە پێشكەوتن بەردەوام بێت، هەروەها دووپاتی لە هەماهەنگی و بەهێزكردنی پەیوەندییەكانی هەرێمی كوردستان و ئەمەریكا كردەوە.
مەسروور بارزانی ڕاوێژكاری ئەنجوومەنی ئاسایشی هەرێمی كوردستان گوتی، هەرێمی كوردستان هەمیشە بڕوای بە رێگە چارەی ئاشتیانە و گفتوگۆ هەبووە بۆ چارەسەریی كێشەكان لە ناوچەكەدا و ئێستەش خوازیارە دانوستانەكانی نێوان هەولێر و بەغدا هەرچی زووترە بۆ ئاستی ئیداری و سیاسی بگوازرێنەوە.
راوێژكاری ئەنجوومەنی ئاسایشی هەرێمی كوردستان دەڵێت، جێبەجێكردنی دەستوور بە ئامرازە نادەستوورییەكان ناكرێت، بەڵكو بە گفتوگۆ و دانوستانی ڕاستەوخۆ و لەیەك گەیشتن دەتوانرێت چارەسەریی گونجاو بۆ كێشەكان بدۆزرێنەوە.