هونەرمەند فەیسەڵ محەمەد: ئەم وێنەم تەنیا بۆ خۆشی گرتووە


وێنەیەكی مامۆستا فەیسەڵ محەمەد هونەرمەندی ناسراوی شاری هەولێر لە تۆڕە كۆمەڵایەتییەكان بڵاو بووەتەوە و بووەتە جێگەی سەرەنجی بەكارهێنەرانی تۆڕە كۆمەڵایەتییەكان و ئەوان داخی خۆیان دەردەبڕن بەرامبەر ئەو هەموو خزمەتەی ئەو هونەرمەندە لە بوارەكانی هونەری و پەروەردە كردوویەتی و ئێستەش خەریكی پێڵاو بۆیاغكردنە. 

هەندێك لە هونەرمەند و ڕۆشنبیر و كەسانی ئاسایی بە توندی هێرشیان كردە سەر وەزارەتی ڕۆشنبیری و لایەنی پێوەندیدار و حكوومەتی هەرێمی كوردستان، كە هونەرمەند و مامۆستای ناوبراو بە هۆی تەنگژەی دارایی و بە ناچاری لەسەر كورسی بۆیاغچیەتی دانیشتووە و پێڵاوی خەڵك بۆیاغ دەكات، بەڵام ئەمە ڕاستی بابەتەكە نییە. 

لەربارەی ئەو وێنەیە فەیسەڵ محەمەدی هونەرمەند بە "وشە"ی راگەیاند، من مامۆستا و هونەرمەندم و ئەو وێنەیە وێنەی ڕاستەقینەی منە و منم لەسەر ئەو كورسییە دانیشتوم و بۆ خۆشی ئەو وێنەیەم گرتووە، ئەگەرنا كاری بۆیاغچیەتی ناكەم و مامۆستای دواناوەندیم و وانەی ئینگلیزی دەڵێمەوە، لەپاڵ كاری مامۆستایەتی كاری هونەریش دەكەم، ئەو هونەرمەندە گلەیی ئەوە دەكات كە وێنەگرتنەكەی بۆ خۆشی بووە و بابەتەكە زۆر گەورە كراوە.

هونەرمەند فەیسەڵ محەمەد لە ساڵی 1955 لە شاری هەولێر لەدایك بووە و ساڵی 1970 رۆڵی لە بەرهەمی شانۆیی بینیوە و بەشداری لە درامای "كۆنە دەرگە" كردووە، پێشتر یاریدەدەری ڕاگری پەیمانگەی هونەرە جوانەكانی هەولێر بووە، ئێستەش مامۆستایە لە قوتابخانەی دواناوەندی ئیبن مستەوفی ئێواڕان لە شاری هەولێر. 

بەكارهێنەرانی تۆڕە كۆمەڵایەتییەكان وێنەكەیان بڵاو كردووەتەوە و نووسیویانە، بەداخەوە ئەوە سووكایەتی و بێرێزكردنێكی بە ئاشكرای چینی ڕۆشنبیر و هونەرمەند و مامۆستایانە. یەكێكی تر نووسیویەت، مامۆستا فەیسەل لە قۆناغەكانی خوێندنی سەرەتایی مامۆستام بووە و وانەی ئینگلیزی پێ گوتووم، ئێستە كە ئەو وێنەیە دەبینم زۆر هەست بە شەرمەزاری دەكەم، كە مامۆستا و هونەرمەندێك خاوەن ئەو هەموو ساڵە خزمەت بێت كەچی ئەوە پیشەكەی بێت، لە كاتێكدا هەندێ بەناو هونەرمەند هەن كە هیچیان نەكردووە، كەچی خاوەن هەموو شتن. 
هەندێكیش نووسیویانە، بەداخەوە مامۆستا فەیسەل گیان، سەرەتا وامزانی كارێكی نوێی هونەریتە، بەڵام دەرچوو كە پیشەی ئێستەتە، گریانم بۆت ناوەستێت.
 
هەولێر/ شاخەوان شێخانی



وشە - مه‌حموود ئیسماعیل


PM:07:40:18/11/2017




ئه‌م بابه‌ته 731 جار خوێنراوه‌ته‌وه‌‌