بەشەخۆراكی فەوتاوی هاووڵاتییان قەرەبوو دەكرێتەوە

بەڕێوەبەری گشتیی كۆمپانیای دابەشكردنی خۆراك لە سلێمانی ڕای گەیاند، بەشەخۆراكی مانگانە كە فەوتاون قەرەبوو دەكرێنەوە و لە ماوەی یەك ساڵیشدا یەكجار مادەی برنج لەگەڵ بەشەخۆراك لە بەغداوە ڕەوانە كراوە.

ئەمڕۆ دووشەم چواری كانوونی یەكەم، شەوكەت محەمەد، بەڕێوەبەری گشتی كۆمپانیای دابەشكردنی خۆراك لە سلێمانی بە "وشە"ی ڕاگەیاند: "تا ئێستە بەغدا بۆ ساڵی 2017 یەكجار برنجی وەك بەشە خۆراك بەسەر هاووڵاتییاندا دابەش كردووە و چەند ڕۆژی رابردووش بەشێكی تر لە برنج ڕەوانە كراوە، بەڵام جاری دابەش نەكراوە."

زیاتر گوتی: "شەكر تا مانگی حەوتی ئەم ساڵ دابەش كراوە و ڕۆنیش تا مانگی هەشت دابەش كراوە هەروەها ئەو بەشە خۆراكانەیشی كە لەم ساڵدا نادرێت و بە فەوتاو حیساب دەكرێ‌ لە بەرانبەردا قەرەبووی هاووڵاتییان دەكرێتەوە."

بەگوێرەی قسەی ئەو بەرپرسەی وەزارەتی بازرگانی، ساڵی ڕابردووش بەغدا هەر سێ بەشە خۆراكی برنج و ڕۆن و شەكری هاووڵاتییانی لە كاتی خۆی نەنارد و چەند مانگێك قەرزارە.

دواكەوتنی بەشەخۆراكی مانگانەی هاووڵاتییان لە كاتێكدایە كە ئێستە لە ناو مانگی 12 داین و تا ئێستە بەشەخۆراكی مانگی هەشت و نۆ دابەش نەكراوە سەرباری كەموكوڕی لەو مادە خۆراكیانەی لە بەغداوە بۆ هەرێمی كوردستان دەنێرێت.

سلێمانی/ هۆشیار عەلی





وشە - سه‌رخێڵ هاشم


PM:07:36:04/12/2017




ئه‌م بابه‌ته 11393 جار خوێنراوه‌ته‌وه‌‌