هەولێر: منداڵێك لەلایەن دایكییەوە دوو مانگە خۆراكی پێ نەدراوە

وەزیرێكی حكوومەتی هەرێمی كوردستان دەڵێت، لە یەكێك لە نەخۆشخانەكان سەردانی منداڵێكی تەمەن نۆ ساڵم كردووە كە لەلایەن دایكییەوە دوو مانگە خۆراكی پێ نەدراوە و سزا دراوە.

ئەمڕۆ چوارشەم شەشی كانوونی یەكەم، محەمەد هاودیانی وەزیری كار و كاروباری كۆمەڵایەتی حكوومەتی هەرێمی كوردستان لە لاپەڕەی تایبەتی خۆی لە تۆڕی كۆمەڵایەتی فەیسبووك نووسیویەتی، سەردانی نەخۆشخانەی ڕاپەرینی كردووە لە هەولێر بۆ بینینی ئەو منداڵە و‌ زۆر نامرۆڤانە مامەڵە لەگەڵ یوسفی نۆ ساڵ ئەنجام دراوە.

وەزیری كار و كاروباری كۆمەڵایەتی دەڵێت، دوای پشكنینی تەندروستی، دەركەوتووە كە ماوەی دوو مانگە خۆراكی پێ نەدراوە و ئەوەش وای كردووە كێشی ئەو منداڵە بۆ تەنیا 10 كیلۆ دابەزیوە.

هاودیانی ئاشكرای دەكات كە ئەو منداڵە لە جووڵە و رۆیشتن كەوتووە، بۆیە بڕیاریان داوە بەزووترین كات خزمەتگوزاریی تەندروستی پێشكەش بكرێت و دواتریش بگوازرێتەوە بۆ خانەكانی وەزارەتی كار و كاروباری كۆمەڵایەتیی حكوومەتی هەرێمی كوردستان.

ڕووداوی ئەشكەنجەدانی منداڵ لە ڕابردوو چەند حاڵەتێك هەبوو، لەلایەن دەزگە تەناهییەكان و لایەنی پێوەندیدار كۆنتڕۆڵ كراوە و بكەرانی ڕووداوەكان دراونەتە دادگا.



وشە - رامیار جەواد


PM:02:32:06/12/2017




ئه‌م بابه‌ته 5318 جار خوێنراوه‌ته‌وه‌‌