ئەمڕۆ پێنجشەم شەپۆڵێكی بەفربارین هەرێمی كوردستانی گرتەوە و لە چەند وێنەیەكدا دەردەكەوێت كە دەڤەری سۆران بەهۆی بەفرەوە بەرگی سپی پۆشیوە.
فەرزنگ ئەحمەد بەڕێوەوەبەری شارەدێی حاجی ئۆمەران لە سنووری پارێزگەی هەولێر بە"وشە" ی ڕاگەیاند، بەهۆی ئەو شەپۆڵە بەفربارینەی ئەمڕۆ سەنتەری حاجی ئۆمەرانی گرتەوە، زیاتر لە 30 سم بەفر باریوە و تیمەكانی پاككردنەوەی ریگەوبان بەردەوامن لە ڕاماڵینی بەفر.
بەهۆی كاریگەریی نزمە پاڵەپەستۆی توركیا و رۆژئاوای ئێران و هاتنی بارستە هەوایەكی سارد، ئەمڕۆ پێنجشەم لە ناوچە جیاجیاكانی هەرێمی كوردستان باران و بەفر باری، بەڵام شەو باران و بەفر دەوەستێت و پلەكانی گەرمی روو لە دابەزین دەكەن.
بەپێی پێشبینییەكانی كەشناسی هەرێم, بۆ سبەی هەینی ئاسمانی كوردستان نیوچە هەور دەبێت و پاشان دەگۆڕێت بۆ ساماڵ و پەڵە هەور و پلەكانی گەرمیش نزم دەبنەوە. لە هەولێر پلەكانی گەرمی بۆ دوو پلە لە سلێمانی بۆ یەك پلە و لە دهۆكیش بۆ سفر و لە كەركووكیش بۆ چوار پلەی سیلیسی دادەبەزن.
سۆران/ موڕشید برادۆستی