ئەو رووناكییەی شەوانە لە ئاسمانی پارێزگای دهۆك دەبینرێت چییە؟


ماوەی چەند رۆژێكە چوار رووناكی لە سنووری پارێزگای دهۆك بە شێوەیەك لە ئاسمانی شارۆكەكانی ئامێدی، ئاكرێ، شێخان، بەردەرەش و بارزان دەردەكەوێت و هاووڵاتییانی ناوچەكە تووشی سەرسورمان بوونە و چەندان لێكدانەوەی بۆ دەكەن، شارەزایەكی بواری تەكنۆلۆجیا و زانست نهێنی ئەو رووناكییە لێ دەداتەوە.

ئێقبال عومەر هاووڵاتییەكی سنووری شارۆكەی ئامێدی سەر بە پارێزگای دهۆكە بە "وشە"ی راگەیاند، ماوەی چەند رۆژێكە سێ رووناكی و هەندێكجار چوار رووناكی بە شێوەیەكی دیار و بەرچاو و ئاشكرا لە باشووری ئاسمانی شارۆكەی ئامێدی دەبینڕێت و خەڵكانێكی زۆر سەیری دەكەن، بەڵام تا ئێستە كەس نەیزانیوە ئەو رووناكییە چییە؟.

زیاتر گوتی، رووناكییەكە وەك لایتێك وایە و كەمێك بەرزتر لە چیاییەكان دەردەكەوێت، بەڵام رووناكییەكە جێگیرە و ناجولێت و لە رۆژانی باران و هەوردا نابینرێت.

رەمەزان حەمزە ماموستای زانكۆی دهۆك و پسپۆڕ لە بواری زانست و تەكنۆلۆجیا بە "وشە"ی راگەیاند، ئەو رووناكییەی كە خەڵكی سنووری پارێزگای دهۆك لە ناوچەكانی ئامێدی، شێخان، بەردەرەش، ئاكرێ و بارزان دەیبینن، رووناكییەكی نوێیە لە ئاسمانی پارێزگای دهۆك دەردەكەوێت و رووناكییەكی دەستكردە و جۆرێكە لە زانستی سەربازی كە لە شەڕەكاندا دەبینرێت.

زیاتر گوتی، سەرچاوەی ئەو رووناكییە لە هیچكام لەو شارۆكانە نییە، بەڵام لەبەر ئەوەی كەمێك بەرزە لە هەموو ناوچەكان دەبینرێت و ئەو رووناكییە رووناكی سەربازی توركیایە و بەدواداچوونێكی سەربازیی توركییە لەو ناوچانەی كە چەكدارانی پەكەكەی لێیە.

روناكییەكە لە سنووری شارۆكەی زاخۆ و سێمێل و ناوەندی شاری دهۆك نابینرێت و ئەو ناوچانەی كە دەبینرێن زیاتر ناوچە شاخاوییەكانن، تا ئێستە هیچ لێكۆڵینەوەیەك لەو رووناكییە نەكراوە بۆ ئەوەی بە وردی بزانین چییە؟ و بۆچی تەنیا لەو شوێنانەدا دەبینرێت و مەبەست لە دانانی ئەو رووناكییە لەوێ چییە؟، ئەو پسپۆڕە وای گۆت.

بەپێی قسەكانی ئەو پسپۆڕە، رووناكییەكە هیچ مەترسییەكی بۆ سەر ژیانی هاووڵاتییان نییە و جورێكە لە زانستی سەربازی و لە كات و ناوچەی شەڕ دەردەكەوێت و زیاتر بۆ زانیاری وەرگرتنە، بەڵام تا ئێستە ناوی زانستی ئەو رووناكییە نەزانراوە.

دهۆك/ نەوزاد هلۆری



وشە - مه‌حموود ئیسماعیل


PM:12:07:15/12/2017




ئه‌م بابه‌ته 14532 جار خوێنراوه‌ته‌وه‌‌