فەیسەل ئیبراهیم: پێویستم به‌ به‌رگری كوتله‌ی ناو كۆمه‌ڵ نه‌بوو..ده‌ستم له‌كار كێشایه‌وه‌

دوورخستنەوەی سەرۆكی فراكسیۆنی خزمەت كە فراكسیۆنی لایەنە ئیسلامییەكان بوو لە ئەنجوومەنی پارێزگای سلێمانی، زۆر كاردانەوەی بەدوای خۆیدا هێنا، ئەو پێشتر كادرێكی پێشكەوتووی كۆمەڵی ئیسلامی بوو، بەڵام حزبەكەی بێ ئاگەداری خۆی لەگەڵ فراكسیۆنەكانی تر ڕێككەوتن و لە ئەندامیەتی ئەنجوومەن دوور خرایەوە. فەیسەل ئیبراهیم لە دیمانەیەكی "وشە"دا بۆچوونی خۆی لەسەر ئەو ڕووداوە و دۆخی كوردستان و پرسی گەندەڵی و مۆدێلی حزبی كوردی و پرسی كشانەوە لە حكوومەت و زۆر پرسی تر دەخاتە ڕوو.

لەم دواییە لە میدیا و تۆڕەكانی كۆمەڵایەتی پرسی ئیقالەكردنی ئێوە و دوورخستنەوەت لە كۆمەڵ زۆر باسی لێوە دەكرێ، بە واقیعی ئەمە چۆنە؟
لەبارەی دوورخستنەوەی من لە ئەنجوومەنی پارێزگا، دیارە وردكاری زۆرە و بڕیارێكی سیاسی لە پشتە نەك یاسایی، چونكە درۆیەكی زۆر لەو پرسەدا كرا، گوایە من 18 مانگ لە كوردستان نیم و نەگەڕاومەتەوە، لە كاتێكدا من كۆتا جار لە 10ی ئەیلوول/سێپتێمبەری 2017 گەشتم بۆ دەرەوەی هەرێم كرد و بۆ كۆبوونەوەی 24/10/2017 یەكەم كۆبوونەوەی دوای سەفەركردنم، یەكەم ئاگەداری كاتی دیاریكراوی كۆبوونەوە نەبووم، ئەو بارودۆخەی لە فڕۆكەخانەكانی هەرێم دروست بوو، لای هەمووان ڕوونە هۆكارێك بوو كە نەتوانم گەشت بكەم.
بۆ پرسی دەركردنم لە كۆمەڵ، من خۆم وازم هێناوە لە ڕێكەوتی 30 تشرینی یەكەم/ئۆكتۆبەری 2017ەوە هیچ پێوەندییەكم بەو حزبەوە نەماوە، دوای ئەوەش چەندان هەوڵ لەلایەن كۆمەڵەوە درا، بۆ ئەوەی دەستكێشانەوەم لە حزبەكە بكشێنمەوە، بەڵام گوتم ئەوە بڕیاری كۆتای منە و گەڕانەوەی نییە.

دەگوترێت لەناو كۆمەڵ باڵباڵێن هەیە، باڵی نەهزەكان و عەلی باپیر ئەمیر و دڵشاد گەرمیانی، بۆچوونت لەسەر ئەمە چییە، ئایا ڕاستە و بوونی هەیە یان شتی لەو جۆرە نییە؟
بۆ باڵباڵێن لەناو كۆمەڵ، لەبەرئەوەی من بڕیاری كۆتام لەو حزبە داوە، هەرچەند بڕیاڕێكی زۆر خراپیان لەسەر من دا، دژ بە بنەمای شەرعی و حزبی، بەڵام تا كۆتای مانگی ئۆكتۆبەری ئەمساڵ بەشێك بووم لە خراپی و چاكی ئەو حزبە، هەرچەندە سەرنج و تێبینیم لەسەر كارەكانی هەبوو و هەمیشە لە ناوخۆ باسم كردوون، بەڵام بە گونجاوی نازانم باس لە هیچ شتێكی كۆمەڵ بكەم، لە كاروباری ناوخۆ شتێكی ئاسایییە و چاوەڕوانكراویشە، بۆچوون و دیدی جیا هەبێ، لە ئۆرگان و پێكهاتەی حزبی و حكوومی كۆمەڵ لە بزووتنەوەی ئیسلامی و بزووتنەوەی راپەرین پێكهاتووە.

باس لەوە دەكرێ باڵباڵێنی ناو كۆمەڵ هۆی ئەوە بووە ئەم هەڵوێستە لە دژی تۆ وەربگیرێ؟ ئایا تۆ بوویت بە قوربانی ئەو باڵباڵێنەی كە لەناو كۆمەڵدا هەیە؟
من لە نامەكەم ڕوونم كردووەتەوە، هیچ كاتێك سەربە هیچ خەتێكی ناو بزووتنەوەی ئیسلامی و كۆمەلی ئیسلامی و دەرەوەیشی نەبووم، بە دڵنیایی لە هەموو حزبێك ئەوانەی لە خەت و كوتلەیەكن بەرگری لە پێگە و خەڵكی خۆیان دەكەن، بەڵام هەرگیز پێویستم بەو بەرگرییە نەبووە و هەستیشم بەوە كردووە كە ئەو بارودۆخە كاریگەری لەسەر بڕیارەكەی دژی من هەبووە. چونكە ناڕوونی نامە بۆ سەرۆكایەتیی ئەنجوومەن و دواتر پێوەندیكردن بە لایەنەكانی تری ناو ئەنجوومەن بۆ كۆكردنەوەی دەنگ دژی من و ئاوا خێراكردنی شتەكان كە خۆم ئاگەداری هیچ نەبووم، جێی گومانی زۆرە، من هەمیشە لەناو حزب گوتوومە، ئەندامی حزبەكەم نەك كۆیلەی حزب، ناتوانم پێچەوانەی باوەڕ و قەناعەتی خۆم كار بكەم، بۆ ئەوەی فڵانێك پێی خۆش بێ، بەڵام بە داخەوە زۆربەی حزبەكان كۆیلەیان دەوێ نەك ئەندام.

لە نامەكەتدا هاتووە كە دۆخی ژیانتان قورس بووە و حزب هیچ ڕەچاوی ئەمەی نەكردووە، بۆچی گوێتان لێ نەگیرا؟
من گوتوومە هەموو كارێك و بەرپرسیاریەتییەك پێداویستی خۆی پێویستە، سەرباز بۆ شەڕ پێویستی بە چەك و تەقەمەنییە، رووناكبیرێك پێویستی بە خوێندنەوە و جووتیارێك پێویستی بە كەرەستەی كشتوكاڵە، گوتوومە ئەو كارەی ئێمەیش پێویستی بە كۆمەڵێك شت هەیە كە هیچمان نییە، بەڵام بەداخەوە گوێمان لێ نەگیرا و چەند جارێك باسمان كرد، گەورەترین كێشەی هەرێمی كوردستان ئەوەیە، كەس هیچ نییە جگە لە مەكتەبی سیاسییەكان، بڕیار و دەسەڵات لای ئەوانە، هی كۆمەڵیش هەر بەو شێوەیە. من نەمشاردووەتەوە كە ئەو مووچەیە بەشی ژیانم ناكات، هەموو كەسەكانی تریش ئەمە دەڵێن، من زیاتر لە 10 جار گوتوومە دەمەوێت دەست لەكار بكێشمەوە و نە خۆم بخەڵەتێنم نە خەڵك، بەڵام قبووڵ نەدەكرا.

وەك كادرێكی پێشووی كۆمەڵ چۆن دەڕوانیتە سیاسەتی ئەو حزبە؟ بەردەوام ڕەخنەی ئەوە لە كۆمەڵ دەگیرێ كە لە حكوومەت و دەسەڵات بەشدارە و كەچی وەك ئۆپۆزسیۆن مامەڵە دەكات؟
من تا 30ی مانگی 10 كە لەناو كۆمەڵ بووم ئەو سیاسەتەی حزبەكە پێڕەوی دەكرد، پێم دروست نەبووە، تێبینیشم لەسەری هەبووە و ئەوەشم بە بەرزترین ئاستی حزب گوتووە، پێشبینی ئەم دۆخە خراپەم كردووە و ئێستەیش گەشبین نیم، حكوومەتی ئیئتیلافی لە دنیا كە لە نێوان دوو حزب دەكرێ، زۆر خراپە، ئەگەر لە نێوان چەندان حزب بێ، زۆر خراپتر، لەو بڕوایەم ستراكچەری كۆمەڵایەتی كوردستان و عێراق ناڕێكە و زۆری ماوە بۆ پێڕەوكردنی حكوومەتی دیموكراتی و شەفاف و گەمەی دەستاودەستكردنی دەسەڵات و چەسپاندنی حكوومەتی زۆرینە، هەر سیاسییەك نەتوانێ واقیعەكە بخوێنێتەوە، ناتوانێ سیاسەتێكی سەركەوتوو ئەنجام بدات.

گرفتێكی گەورە لە كوردستان هەیە، هەر كاتێك بەرپرسێك یان كادرێكی باڵای حزبێك دوور دەخرێتەوە یان دەست لەكار دەكێشتەوە، هەڵمەتی چڕی جنێو و تەشهیر لە تۆڕەكانی كۆمەڵایەتی دژی ئەو كەسە دەست پێ دەكات، ئەمە تا چەند تەندروستە و هۆكارەكەی چییە؟
ڕاستییەكەی ئەوەیە لای ئێمە هەیكەل و فكر و بنەمای حزب تێكچووە، لە دنیادا حزب سەركردە دروست دەكات، لای ئێمە سەركردە حزب دروست دەكات، هەموو هیوا و ئامانج و فكر و بنەما و داهاتوو و پرۆگرامی حزب چڕ دەكرێتەوە لە كەسێكدا، ئەمە وا دەكات ئەندامان وا بزانن وازهێنان یان لەدەستدانی ئەم سەركردەیە كۆتای پێگەكەیەتی و لە كوردستانیش واقیعەكە وایە، كەسانی خوار ئەمەیش كە مەكتەبی سیاسییەكان هەمان ڕۆڵ دەبینن و كۆمەڵێك دەزگەی ڕاگەیاندن و كادر و سەرچاوەی داهات و دارایی كۆنتڕۆڵ دەكەن دژی نەیارەكانیان، پێگەی ئەلیكترۆنی و تۆڕە كۆمەڵایەتییەكان دژی هەر كادرێك كە واز لە حزبەكە بێنێ وەگەڕ دەخەن و مەكینەی میدیایی دژی دەخرێتە كار، ئەمەیش بووەتە كار و كاسبی بۆ هەندێك كەس، هەڵبەت كار و كاسبییەكی یەكجار قێزەون.

كاتێك بەرپرسێك یان كادرێكی باڵای حزبێك دوور دەخرێتەوە یان دەست لەكار دەكێشتەوە، هەڵمەتی چڕی جنێو و ناوزڕاندن لە تۆڕەكانی كۆمەڵایەتی دژی ئەو كەسە دەست پێ دەكات، هۆی ئەمە چییە؟
گرفتەكە لەوەدایە حزبی كوردی لە بنەڕەتدا باوەڕی بە ئەندامبوون نییە و دەبێ كۆیلەی بین، وازهێنانی كۆیلە لە سەردارەكەی كارێكی شیاو و قبووڵكراو نییە، ئەم حاڵەتە پێویستی بە دروستكردنەوەی تاكی كورد هەیە، ئەندامانی حزب خۆیان خەتابارن و خۆ بچووك دەكەنەوە، سەركردایەتییەكان وەك كۆیلە سەیریان دەكەن، زۆربەی كات ئەندام نازانێ بنەمای حزبەكەی چییە و ئەندامیشە تێیدا، یان فڵان بەرپرس قسەكەرێكی باشە و ئیتر بووەتە ئەندام لەو حزبە.

لە پرسی گەندەڵی و چاكسازی، هەموو حزبەكان لەسەر شاشەكان باس لە ڕووبەڕووبوونەوەی گەندەڵی و چاكسازی دەكەن، ئەی حزبەكان و حكوومەت هەموو دژە گەندەڵی بن، گەندەڵی لە كوێی كوردستانە؟
پرسی گەندەڵی پەیكەری حزب و حكوومەتی لە كوردستان داڕزاندووە، بەجۆرێك من لەو بڕوایەدام قسەكردن چارەسەركردنی ئەستەمە، بە دڵنیایی بەجۆرێك تەشەنەی سەندووە، پێم وانییە جومگە هەبێ گەندەڵی كاری لێ نەكردبێت، گەندەڵی پێویستی بە پلان و پڕۆژە و متمانە هەیە، هەمووان پڕۆژەیان هەیە، بەڵام متمانە نییە، گەندەڵی بووەتە بەرژەوەندی و كوتلە و هێزی هەیە و هیچ لایەك ناوێرێ و ناتوانێ بەگژیدا بچێتەوە لە ترسی لایەكەی تر.

خەڵكی كوردستان لە دۆخێكی خراپدایە، بەرپرسی حزبەكان و حكوومەت لەوپەڕی خۆشیدا دەژین، كەسێك حاڵی وەك حاڵی خەڵكەكەی نەبێ، دەتوانێ داكۆكیكاریان بێ و لە ئازار و مەینەتیان تێ بگات؟
بەدڵنیایییەوە سەرۆكی حزبەكان و مەكتەبی سیاسییەكان ژیانیان وەك خەڵكی ئاسایی نییە، ئەوانیش جیاوازییان لە ناوخۆیاندا هەیە، بەڵام سەرۆكی هیچ حزبێك وەك خەڵكی ئاسایی ناژی، هەر ئەوەندە بەسە تا ئێستە بیستووتانە سەرۆكی حزبێك وازی هێنابێ لە پۆستەكەی؟ یان چەند جار حزبەكەی خۆی لەت كردووە تا خۆی بووە بە كەسی یەكەمی حزبەكە، ئەم مۆدێلە لە حزبی كوردی مێژوویەكی قووڵی هەیە، پرسیاری ڕژد ئەوەیە ئەگەر ئەو ئەركە هێندە قورس و پڕ مەترسی و خراپە، بۆ وازی لێ ناهێنن؟.

ڕەخنەیەكی زۆر لە حزبە ئیسلامییەكانی كوردستان دەگیرێ كە ناتوانن ڕەوتێكی هاوبەش لە نێوان خۆیان دروست بكەن، كەچی باس لە یەكخستنی مسوڵمانان دەكەن بۆ پشتیوانیكردن لە قودس، باس لە یەكڕیزیی ناوماڵی كوردیش دەكەن، لەسەر ئەمە بۆچوونت چییە؟
یەكخستن و یەكگرتنی لایەنە ئیسلامییەكان لە كوردستان زۆر قورسە و لە مەحاڵ نزیكە، چونكە حزب و ڕێكخراو بەرهەمی عەقڵ و هۆشی مرۆڤن، جیاوازی بنەڕەتی لە فكر و زهنی سەركردە و بنكەی جەماوەری ئەو لایەنانە هەیە و تا ئێستەیش سەركردەیەكی وا دروست نەبووە بتوانێ هەموو ئەوانە تێپەڕێنێت و لەیەكیان نزیك بكاتەوە.

لە سلێمانی ململانێی قووڵی سیاسی و گرفتی گەورە هەن، لەوكاتەی لە ئەنجوومەنی پارێزگا بوویت، تا چەند ململانێی سیاسی ڕێگر بوو لەسەر خزمەتكردنی خەڵكی شارەكە؟.
چەقی ململانێی سیاسی كوردستان لە سلێمانییە، پێگەی سەرەكی یەكێتی و حزبەكانی ترە، دروستبوونی گۆڕان و پێشتریش كۆمەڵی ئیسلامی، لە ئەنجامی كێشەكانی ناو یەكێتی و بزووتنەوەی ئیسلامی بوون، دیارە كێشەكانی یەكێتی زۆر گەورەتر بوون و بەردەوامیش لە گەورەبووندان، ئەم كێشانەیش بارتەقای قەبارەی یەكێتی كاریگەرییان لەسەر پارێزگای سلێمانی هەیە، بێگومان ئەمانەیش كاریگەری لەسەر كارەكانی ئەنجوومەنی پارێزگا هەبووە، تا ڕێككەوتنی یەكێتی و گۆڕان نەكرا، نەتوانرا پۆستی پارێزگار و سەرۆكی ئەنجوومەن یەكلا بكرێتەوە كە نزیكەی حەوت مانگی خایاند، ئەنجوومەنی پارێزگا و پەرلەمان لەژێر هەژموونی مەكتەب سیاسییەكان و ناتوانن لە قسەیان لا بدەن.

كۆمەڵ و گۆڕان لە حكوومەت كشانەوە، ئەمە تا چەند لە خزمەتی خەڵكدایە و چی لە دۆخەكە دەگۆڕێ؟
لەو بڕوایەدام كشانەوە لە حكوومەت چارەسەری كێشەكان ناكات و زۆر لە دۆخەكەیش ناگۆڕێ، دیارە حكوومەتی بنكەفرەوان لە ئەنجامی ڕێككەوتن دروست بووە، پێش كشانەوە لە حكوومەت دەبوو باسی ڕێككەوتنەكە بكرێ، ئایا چەندی جێبەجێ كراوە، دەكرا لە دوو ساڵی یەكەم پێداچوونەوە بە ڕێككەوتنەكە بكرایە، پاشان ڕوونكردنەوە بە لایەنی بەرانبەر بدرایە، بەڵام مەكتەبی سیاسییەكان ئەو بڕیارانە دەدەن و هەمووی بڕیاری سیاسین و باكگڕاوەندی تریان هەیە، چونكە ڕێگە دروستەكە ئەوەیە كوتلەی وزاریی فڵان لایەن لە حكوومەت دەبێ ڕاپۆرتی خۆی ئامادە بكات و بە سەرۆكایەتی حكوومەت و حزبی بدا و باس لە ڕێگری كاركردنیان بكات، ئەو ڕێگرییانە كە نایەڵن بەرنامەی كاری خۆیان جێبەجێ بكەن، پاش ئەوەی چەندان جار ئەو ڕوونكردنەوەیە بە هەردوولا درا و دەزگەكانی ڕاگەیاندنی لێ ئاگەدار كرانەوە، زانرا لەگەڵ سەرۆكایەتیی حكوومەت بە ئەنجام ناگەن، ئەوا كوتلە وزارییەكە كشانەوە لە حكوومەت ڕادەگەیەنێ و مەكتەبی سیاسی بڕیارەكەیان پەسەند دەكات، بەڵام لای خۆمان تەواو پێچەوانەیە و مەكتەبی سیاسی بڕیار دەدات و وەزیرەكانیش دەبێ جێبەجێ بكەن. 
پرسی حكوومەتی ڕزگاری نیشتمانی، زۆرم لا سەیرە، حكوومەتی ڕزگاری لە كێ پێك دێ؟ ئایا بێ یەكێتی و پارتی دەكرێ حكوومەت دروست بێ، بێ یەكێتی یان بێ پارتی؟ لەم دۆخە سیاسییە و واقیعەی هەرێمی تێدایە، بێ پارتی و یەكێتی دروستكردنی حكوومەتی ڕزگاری زۆر ئەستەمە، بۆیە ئەم قۆناغە پێویستی بە گفتوگۆی هەمووان و واقیعی هەیە بۆ ڕێكخستنی ناوخۆی هەرێم و پاشان گفتوگۆی نێوان هەرێم و بەغدا.
بابەتێكی تری كشانەوەی گۆڕان و كۆمەڵ لە حكوومەت و مانەوەیان لە پۆستە حكوومییەكانی پارێزگای سلێمانی، ئەمە شتێكی زۆر سەیرە، چۆن دەكرێ لە پارێزگایەك ئۆپۆزسیۆن بیت و لە پارێزگایەكی تر حكوومەت!



وشە - باز ئه‌حمه‌د


AM:10:52:01/01/2018




ئه‌م بابه‌ته 2519 جار خوێنراوه‌ته‌وه‌‌