لە سلێمانی ژنێك كۆتایی بە ژیانی خۆی هێنا


ئێوارەی ئەمڕۆ یەكشەم ژنێكی تەمەن ٣٠ ساڵ لە شارەدێی عەربەتی سەر بە پارێزگای سلێمانی كۆتایی بە ژیانی خۆی هێنا.

ئیقبال محەمەد, گوتەبێژی پۆلیسی شارۆكە و شارەدێكانی سلێمانی بە "وشە"ی راگەیاند, دوای ئەوەی ئاگەدار كراینەوە بە بوونی رووداوێك و دوای گەیشتنی هێزەكانمان دەركەوت كە ژنێك خۆی كوشتووە.

زیاتر گوتی, ئەو ژنە ناوی (ب, ح ) و تەمەنی ٣٠ ساڵە و ژنی ماڵەوەیە و خاوەنی چوار منداڵە و لە ماڵەكەی خۆیدا بە چەكی كڵاشینكۆف كۆتایی بە ژیانی خۆی هێناوە.

ئەو گوتەبێژە دووپاتی كردەوە كە تەرمەكەی رەوانەی پزیشكی دادی سلێمانی كراوە و دەست بەسەر چەكەكە گیراوە و پەڕاوی لێكۆڵینەوەیش بۆ رووداوەكە كراوەتەوە.

شایەنی باسە هەر ئەمڕۆ لە گەڕەكی كەلاری كۆن، كۆنترین گەڕەكی شارۆكەی كەلار، ئافرەتێكی تەمەن 53 ساڵ بەناوی (ا . ا) بە گوریس خۆی خنكاند.

سلێمانی/ هۆشیار عەلی



وشە - مه‌حموود ئیسماعیل


PM:11:55:07/01/2018




ئه‌م بابه‌ته 104 جار خوێنراوه‌ته‌وه‌‌