مەكتەبی ئیدارە و دارایی گشتی یەكێتیی نیشتمانی كوردستان رونكردنەوەیەك لەسەر هەواڵێك لەبارەی وەرگرتنی بڕی دوو ملیۆن دۆلار دەدات و پشتڕاستی دەكاتەوە كە ئەو پارەیان لە حكوومەت قەرز كردووە.
ئەمڕۆ سێشەم 16تی كانوونی دووەم، لە روونكردنەوەكەی مەكتەبی ئیدارە و دارایی یەكێتی نیشتمانیی كوردستاندا كە وێنەیەكی دەست "وشە" كەوتووە تیایدا هاتووە، لەهەندێك هەواڵ و كۆبوونەوەدا باسی ئەوە كراوە مەلا بەختیار، لێپرسراوی دەستەی كارگێڕی مەكتەبی سیاسی یەكێتی بڕی دوو ملیۆن دۆلاری لە سەرۆكی ئەنجوومەنی وەزیرانی هەرێمی كوردستان وەرگرتووە.
لە روونكردنەوەكەدا بەشی ژمێریاری مەكتەبی ئیدارە و دارایی گشتی یەكێتی دووپات لەوە دەكاتەوە ئەو دوو ملیۆن دۆلارە لەسەر داوای دلێری سەید مەجید و ئیدارەی گشتی وەرگیراوە و لەدەفتەری حساباتیشدا نووسراوە، هەروەها ئەمە یەكەمجار نییە مەلا بەختیار پێویستیی ئیدارەی گشتی دابین دەكات، پێشتریش هەر لەسەر داوای ئیدارەی گشتی، چ بۆ كارئاسانی كارەكانمان و چ بۆ هاوكاری ماددی و مووچەی كادران و ئۆرگانەكان دەیان جار زیاتری ئەو بڕە پارەیە بۆ ئیدارەی گشتی دابین كردووە.
لەكۆتایی روونكردنەوەكەیشدا هاتووە، بەشی ژمێریاری مەكتەبی ئیدارە و دارایی گشتی یەكێتیی ئاشكرای دەكات هەر ئۆرگان و سەركردەیەكی یەكێتیی گومانی لە چۆنیەتی دابینكردنی دوو ملیۆن دۆلارەكە و چۆنیەتی وەرگرتن و خەرجكردنی هەیە، دەتوانێت بەدواداچوون بكات.
پێشتر بەرپرسانی یەكێتیی باسیان لەوە دەكرد ژێر زەمینەكان پڕیەتی لە فەردە دۆلار و پارەی ئەو حزبەیان بە پارەیەكی خەیاڵی هەژمار دەكرد كە بە پێویستیان دەزانی ئەو پارەیە بێتە دەرەوە و بۆ خەڵكی خەرج بكرێت.