یەكەمین فێستیڤاڵی فرە كەلتووری و خواردنی كوردەواری لە زانكۆی كوردستان-هەولێر بەڕێوە چوو، كە تیایدا چەند بەشدارێك خواردنی تایبەت بە ناوچەی خۆیان ئامادە كرد و پێشكەشی هاووڵاتییانیان كرد.
ئەمڕۆ یەكشەم 20ی تشرینی دووەم/نۆڤەمبەری 2016، بە ئامادەبوونی چەند مامۆستایەك و قوتابی و هاووڵاتییان، یەكەمین فێستیڤاڵی فرە كەلتووری و خواردنی كوردەواری لە زانكۆی كوردستان-هەولێر بەڕێوە چوو، كە تیایدا چەند بەشدارێك خواردنی تایبەت بە ناوچەی خۆیان ئامادە كرد و پێشكەشی هاووڵاتییانیان كرد، لە بەرامبەردا هەر كەسە و بەپێی توانای خۆی بڕێك پارەی دانا، ئەمەش بەمەبەستی هاوكاریی منداڵە هەتیوەكانی كوردستان.
لەو فێستیڤاڵەدا خەڵكی هەریەك لە شارەكانی كوردستان و پێڕەوانی هەر ئاینێك بێ جیاوازی پێكەوە لەسەر مێزێك خواردنەكانیان پێشكەش كرد و مامۆستا و قوتابییانی زانكۆی كوردستان بەشدارییان تێداكرد، لەگەڵ چەندان هاووڵاتیی تردا.
بەشداربووەكان بە جلوبەرگی فۆلكلۆری خۆیانەوە بەشدارییان كرد، بەمەبەستی نیشاندانی شێوەی جلوبەرگی ئەو ناوچەیەی خۆیان و پاراستنی جلوبەرگە كولتوورییەكان و پیشە دەستییە ڕەنگینەكانی تایبەت بە هەر ناوچەیەك.
وشە/ گەیلان محەمەد