بۆچی مەسیحییەكان دوودڵن لە گەڕانەوە بۆ زێدی خۆیان؟

نینۆس عەبدولئەحەدی تەمەن 61 ساڵ هەموو ڕۆژ لە ناو كووچە و كۆڵانی گەڕەكەكانی شارەدێی تلكێفی باكوری ڕۆژهەڵاتی مووسڵ دەگەڕێ و هیوا دەخوازێ خێزانە مەسیحییەكان دووبارە بۆ ناوچەكانی خۆیان بگەڕێنەوە، پاش ئەوەی دەسەڵاتدارانی عێراق دووپاتیان لەوە كردەوە، پێویستە تەواوی ئاوارەكان بۆ زێدی خۆیان بگەڕێنەوە و خزمەتگوزاری و ئاوەدانی لە ناوچەكانیان دەست پێ دەكاتەوە.

نینۆس دەڵێ، كەس نایەوێ بگەڕێتەوە، تەنیا ئێمە و چەند خێزانێكی تر گەڕاوینەتەوە، ئەوانی تر سەرجەمیان دوودڵن و نایانەوێ جارێكی تر بگەڕێنەوە ناوچەكانی خۆیان، نەگەڕانەوەی ئاوارە مەسیحییەكان هەر لە كوردستان نییە، كە سەرجەمیان ئاوارەی ئەو ناوچانە بوون و هەرێمی كوردستان دەرگەی بە ڕوودا كردنەوە، بەڵكو هەریەك لە فڕەنسا و سوید و ئوسترالیا و وڵاتانی تری ئەوروپا دەرگەیان بە ڕووی وەرگرتنی مەسیحییەكانی عێراق كردەوە، تا وەك پەنابەرێك لە وڵاتەكانیان بگیرێنەوە و ژیانی ئاسایی خۆیان دەست پێ بكەن، ئەمەیش وای كرد بە هەزارانیان عێراق بەیەكجاری جێ بهێڵن و ڕوو لە وڵاتانی تری دنیا بكەن.

زۆرێك لە مەسیحییەكانی دەشتی نەینەوا كۆچیان كردووە و نایانەوێ بگەڕێنەوە، بەشی زۆریشیان بەرەو ئەوروپا ڕۆیشتوون، چونكە لەوێ ئاسایش و ئارامی و ڕێز و مافی مرۆڤ هەیە، بەڵام لێرە جیا لە وێرانە و نەخۆشی و ترس لە گەڕانەوەی داعش و بڵاوبوونەوەی میلیشیاكان لەو ناوچانەی دانیشتووانی لێیە و مەترسی شەڕی بەردەوام لەسەر ناوچەكە، وای كردووە سەرجەمیان دوودڵ بن و نەیانەوێ بگەڕێنەوە زێدی خۆیان، ئەمانەیش هۆكاری لۆجیكین، بەڵام سەرەڕای ئەوانیەش ئێمە بێ زێدی خۆمان نەمانتوانی بژین و گەڕاینەوە ناوچەكانی خۆیان، ئێمە خەڵكی ڕەسەنی ئەو ناوچانەین و نەفرەت لەوانەی عێراق داگیر دەكەن.

لە ناو دەیان گوند و شارەدێی مەسیحی لە دەشتی نەینەوا و باكوری ڕۆژهەڵاتی مووسڵ، هیچ یەكێكیان جیاوازیان لێ نەكراوە لە وێرانكردنی ناوچەكانیان، تەنیا شارەدێی بچووك نەبێ لە نزیك شنگال، ئەوێش تا ئێستە هیچ كەسی بۆ نەگەڕاوەتەوە، لەبەرئەوەی بووەتە هێڵی تەماسی نێوان سوپای عێراق و پێشمەرگە و بەردەوامی گرژی لە نێوان هەردوولاوە و ترسی شەڕ و توندوتیژی لە نێوان هەردوو هێزەوە.

سەباح پترس پیاوی ئاینی مەسیحی بە ڕۆژنامەی "العربی الجدید"ی ڕاگەیاند، بەر لەوەی داوای گەڕانەوەی مەسیحییەكان بۆ زێدی خۆیان بكرێ، پێویستە هەڵمەتێكی گەورەی مرۆیی لە ناوچەكە ئەنجام بدرێ، بۆ دووبارە ئاوەدانكردنەوەی ناوچەكان و قەرەبووكردنەوەی خەڵكە زیان بەركەوتووەكان.

زیاتر گوتی، تا ئێستە هیچ خزمەتگوزارییەكی ئاو و كارەبا و ڕێگەوبان بوونی نییە، خانووەكان ڕووخاون و بۆنی تەرمەكان ناوچەكەی تەنیوە، هەموو ڕۆژ نوێژ بۆ خودا دەكەین، كە عێراق بە فرە ڕەنگی بهێڵێتەوە و یارمەتیدەر نەبێ، بۆ زاڵبوونی وڵاتەكە بۆ سەر یەك ڕەنگ و لەناوبردنی ئەوانەی تر، كەنیسە بە تەواوی پشتیوانی گەڕانەوەی خەڵكی مەسیحییە بۆ ناوچەكانی خۆیان، بەڵام بێ ئاوەدانكردنەوە ناوچەكان ئێستە شوێنی ژیان نین، بۆیە گەڕانەوەی خەڵكەكە قورس، چونكە تیرۆریستانی داعش و سوپا و هێزە سەربازییەكان لە ناوچەكە بوونیان ماوە، ناوچەكەیان بە تەواوی وێران كردووە، بۆیە لەجیاتی گەڕانەوە بۆ زێدی خۆیان، زۆرینەی ڕەهای مەسیحییەكان داوای وەرگرتنی مافی پەنابەریان لە وڵاتانی ئەوروپا كردووە.

سەرۆكی ئەنجوومەنی شارەوانی شارۆكەی تلكێف "باسم یەعقووب" دەڵێ، گەڕانەوەی مەسیحییەكان زۆر لەسەرخۆ و كەمە، چونكە تا ئێستە ترسێكی گەورە لای ئەوان ماوە، جیا لەوەی ڕێژەی وێڕانی لە دەشتی نەینەوا زیاتر 80%ی ناوچەكەی گرتووەتەوە، هیچ قەرەبووكردنەوە و ئاوەدانكردنەوەیەكیش بوونی نییە، گەڕانەوە بۆ شارۆكەی حەمدانییە و شارەدێی بەرتلە و كرملێس زۆر باشترە، چونكە ئەو ناوچانە هاوشێوەی تلكێف وێران نەبوون، بەڵام خزمەتگوزارییەكانیش زۆر خراپن و حكوومەتی عێراق و پارێزگای مووسڵ هیچ هەنگاویان نەناوە بۆ ئاوەدانكردنەوەی ئەو ناوچانە.

زیاتر گوتی، ترسی گەورەی ئێستەی مەسیحییەكان لە ڕووبەڕووبوونەوەی حەشدی شەعبی و پێشمەرگەیە لە ناوچەی باتانا كە ئێستە وەك ناوچەیەكی قەدەغەكراوی لێ هاتووە، ترسی زۆری لە دڵی خەڵكی مەسیحی دروست كردووە، ئەمەیش وای كردووە خەڵكی بیر لە گەڕانەوە بۆ ناوچەكانی خۆیان نەكەنەوە.

بەگوێرەی ئامارەكان، تا ئێستە زیاتر لە 10 هەزار خێزانی مەسیحی ڕوویان لە دەرەوەی عێراق كردووە و ئەگەر دۆخی تەناهی و ئاوەدانی بە تەواوی جێگیر ببێ، بەشێكیان ئامادەیییان تێدایە دووبارە بگەڕێنەوە زێدی خۆیان، بەڵام بێ ئاوەدانكردنەوە و لابردنی ترسی شەڕ و نەبوونی خزمەتگوزاییەكان، گەڕانەوە بۆ زێدی خۆیان كارێكی ئەستەم و مەحاڵە.


وشە - باز ئه‌حمه‌د


AM:09:39:10/02/2018




ئه‌م بابه‌ته 187 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌