خاوەنی چەند كۆمپانیایەك لە هەولێر حیساب بۆ حكوومەت ناكەن


بەرپرسێكی بەڕێوەبەرایەتی هاتوچۆی هەولێر ئاشكرای دەكات بەهۆی چەند خاوەن كۆمپانیایەك كە ناوەڕاستی شەقامەكەیان پڕ كردووەتەوە ڕووداوەكانی هاتوچۆ زیادی كردووە.

ئەمڕۆ سێشەم 13ـی شوبات، ڕائید فازڵ حاجی حسێن بەڕێوەبەری ڕاگەیاندنی هاتوچۆی هەولێر بە "وشە"ـی ڕاگەیاند، ڕێگەی هەولێر كەركووك یەكێكە لە ڕێگە سەرەكییەكانی هەرێمی كوردستان و عێراق ئەم ڕێگەیە چەند ساڵێكە كراوەتە دووساید بۆئەوەی كێشەی رووداوەكانی هاتوچۆی تێدا كەم ببیتەوە، بەڵام لەگەڵ دووسایدكردنی لە چەند شوێنێكی شەقامەكەدا لەلایەن كەسانی خاوەن كۆمپانیاوە دوورگەی ناوەندەكە پڕكراوەتەوە و بووەتە شوێنی سووڕانەوەی ئۆتۆمبێلی  تایبەتی بە كۆمپانیاكانیان.

بەڕێوەبەری ڕاگەیاندنی هاتوچۆی هەولێر دەڵێت، بەهۆی ئەم كارەی كۆمپانیاكانەوە بەدەیان ڕووداوی هاتوچۆ ڕووی داوە و چەندان كەس بوونەتە قوربانی، چونكە شوێنی دروستكراوی سووڕانەوەكانی نایاساییە.

ئاماژەی بەوەیشكرد كە دوایین رووداو چەند رۆژیك بەر لە ئیستە بوو كە ئەندامانی خێزانیك بە تەواوی بوونە قوربانی.

لەبارەی چارەسەری ئەو كێشەیە، فازڵ حاجی گوتی، جارێك ئەم پرسەمان گەیاندووەتە ئەنجوومەنی پارێزگا داوای چاكردنێكی بەپەلەی ئەم رێگەیەمان كردووە، بەڵام تا ئیستە هیچ نەكراوە.
 
ئەو ئەفسەرەی هاتوچۆی هەولێر گوتی، داواكارین وەزارەتی ئاوەدانكردنەوە و بەڕێوەبەرایەتی ڕێگەوبانی هەولێر هەڵمەتێك بكەن بۆ ئەم مەبەستە و ئەو شوێنانە لاببەن.

ڕێگەی هەولێر - كەركووك لە ساڵی 2012 كرا بە دووساید ئێستە یەكێكە لە ڕێگە گرنگەكانی هاتوچۆی هەولێر.



وشە - رامیار جەواد


PM:07:37:13/02/2018




ئه‌م بابه‌ته 442 جار خوێنراوه‌ته‌وه‌‌