ئەندامێكی پێشووی ڕێكخراوی تیرۆریستی داعش، هۆشداریی دایە وڵاتان كە ڕێكخراوی تیرۆریستی داعش خەریكی خۆ ڕێكخستنەوە بۆ دووبارە دروستكردنەوەی خۆی و دەركەوتنی بەشێوەیەكی بەهێزتر لە جاران، دوای ئەو شكستە زۆرانەی لە سووریا و عێراق لە چەندان مانگی ڕابردوو تووشی ڕێكخراوە تیرۆریستییەكە بوو.
"ئەبو سەقەر" كە پێشتر ئەمیری پۆلیسی شاری ڕەقەی پایتەختی داعش لە سووریا بوو لە لێدوانێكی بۆ "
سكای نیوز" لە سنووری نێوان سووریا و توركیا لەبارەی ئەو كاتە قسەی كرد كە لە ژێر فەرمان و دەسەڵاتی ڕێكخراوی تیرۆریستی داعش بوو و گوتی، ناچار بووم بچمە ڕیزی تیرۆریستانەوە، بابەتەكە لە دەرەوەی ئیرادە و دەسەڵاتی من بوو، بۆیە دوای چوونیشم بۆ ناو داعش، دەستم كرد بە هەوڵەكانم بۆ وەستاندنی دادگاییكردنی بە پەلەی خەڵك و بێ لێكۆڵینەوە كوشتن و سەربڕین و لە سێدارەدانیان.
ئەو ئەمیرەی پێشووی داعش دەڵێ، لەو ماوەیەی ئەمیری پۆلیسی ڕەقە بووم، یارمەتی خەڵكێكی یەكجار زۆرم دا و ڕێم نەدا حوكمی لەسێدارەدانیان بەسەردا بسەپێنرێت، كە تەنیا پێشێلكاری زۆر بچووكیان بەرانبەر بە سیستەمی توندی ئاینی ڕێكخراوی تیرۆریستی داعش ئەنجام دابوو.
لەبارەی زانیاری و پلانی داهاتووی تیرۆریستانی داعش، ئەبو سەقەر گوتی، لیبیا بنكەی نوێی تیرۆریستانی داعش دەبێ، ئێستە ئەو وڵاتەیش بووەتە دەرگەی هاتنی چەكدارانی داعش بۆ وڵاتانی ئەوروپا و بە چڕی خەڵكی لێ ڕەوانە دەكرێ و سەرجەمی تیرۆریستانیش هەوڵ دەدرێ لە لیبیا كۆ ببنەوە.
زیاتر گوتی، داعش لە لیبیا زۆرترین شانەی نوستووی هەیە و لە داهاتوویەكی زۆر نزیك لیبیا دەبێتە بارەگای سەرەكی تیرۆریستانی داعش و لەوێ جارێكی تر بە هێزەوە دەردەكەونەوە.
رێكخراوی تیرۆریستی داعش دوای كوشتنی ئەبو موسعەب زەرقاوی سەرۆكی رێكخراوی تیرۆریستی تاڵیبان لە عێراق و پەرتبوونی ئەندامی قاعیدە لە عێراق و گرتنی زۆربەیان لەلایەن هێزەكانی ئەمریكا و بەندكردنیان لە گرتووخانەی بووكا و دواتر راكردن و دەربازبوونیان، زۆرینەیان روویان كردە وڵاتی سووریا و لەوێ دەستیان بەكاری رێكخستن و كۆكردنەوەی تیرۆریستان كرد، دوای دەست پێكردنی ئاڵۆزییەكانی لە وڵاتی سووریا لە ئەنجامی درێژبوونەوەی بەهاری عەرەبی و داپۆشینی سووریاش، ئەو رێكخراوە بە سەرۆكایەتیی ئەبوبەكر بەغدادی دەستیان بە جموجۆڵ كرد و توانییان سێیەكی خاكی سووریا كۆنتڕۆڵ بكەن، لە رۆژی 10ی حوزەیران/یۆنیۆی 2014 ئەوان لە سووریاوە پەڕینەوە عێراق و پاش راكردنی سێ فیرقەی سەربازی سوپای عێراق و دەیان هەزار ئەندامی هێزەكانی پۆلیسی مووسڵ، توانییان شاری مووسڵی دووەم گەورە شاری عێراق كۆنتڕۆڵ بكەن و دواتریش پێشڕەوییان كرد بۆ ناوچەكانی باشووری كەركووك و پارێزگەی سەڵاحەدین و ئەنبار و بەشی رۆژهەڵاتی پارێزگەی دیالە و توانییان رووبەرێكی فرەوانی خاكی عێراقیش داگیر بكەن، لە مانگی ئاب/ئۆگستسی 2014 دوای ئەوەی داعش بەرەو ناوچەكانی هەرێمی كوردستان پێشڕەوی كرد و هەردوو شارۆكەی مەخموور و شارەدێی گوێڕی كۆنتڕۆڵ كرد كە نزیكەی 30 كیلۆمەتر لە هەولێرەوە دوورن، هێزەكانی ئاسمانی ئەمەریكا لەسەر فەرمانی سەرۆكی ئەمەریكا راستەوخۆ بەشدارییان لە رووبەڕووبوونەوەی داعش كرد و دەستیان بە بۆردمانی تیرۆریستان كرد و دواتر هاوپەیمانی نێودەوڵەتی بۆ رووبەڕووبوونەوەی داعش لە عێراق و سووریا پێكهێنرا كە زیاتر لە 60 وڵاتی دنیا بە فڕۆكە و چەك و مەشق و راهێنانی هێزەكانی ناوچەكە بەشدارن.
ئەبوبەكر بەغدادی ناوی راستەقینەی ئیبراهیم عەواد ئیبراهیم عەلی بەدری سامەڕائییە، لە 28 حوزەیران/یۆنیۆی 1971 لە نزیك شاری سامەڕا لە دایك بووە و هەڵگری ڕەگەزنامەی عێراقییە و لە زانكۆی بەغدا بەكالۆریۆسی لە یاسا بەدەست هێناوە و دواتر لە كۆلێژی شەریعەی ئیسلامی هەمان زانكۆ بەكالۆریۆسی لە توێژینەوەی قورئان و ماستەری شێوەی خوێندنەوەی قورئان و دواتریش دكتۆرای بەدەست هێناوە، بەر لە 2003 و ڕووخاندنی بەعس لە مزگەوتێكی بەغدا ئیمام و خەتیب بووە، دوای ڕووخانی بەعس، پێوەندی بە رێكخراوی تیرۆریستانی قاعیدە كردووە و لەگەڵ ئەبو موسعەبی زەرقاوی سەرپەرشتی كارە تیرۆریستییەكانی قاعیدەیان لە عێراق كردووە. دوای لەناوبردنی زەرقاوی و گرتنی زۆرینەی ئەندامانی قاعیدە لەلایەن هێزەكانی ئەمەریكا و هاوپەیمانان لە عێراق، بەرەو سووریا ڕای كردووە و لەوێ رێكخراوی تیرۆریستی داعشی دامەزراندووە و خۆیشی وەك رابەڕی گرووپەكە كاری كردووە و لە رێكخراوی تیرۆریستی قاعیدە جیا بوونەتەوە، لە 2014 دوای گرتنی ناوچەیەكی زۆری سووریا، هاتنە عێراق و دەستیان بەسەر سێیەكی خاكی عێراقدا گرت و لە مزگەوتێكی شاری مووسڵ "خەلافەت"ی داعشی ڕاگەیاند و خۆیشی وەك "خەلیفە" ناساند، ئەمەریكی بڕی 10 ملیۆن دۆلاری پێشتر بۆ هەر كەسێك ڕاگەیاند كە شوێنی ئەبوبەكر بەغدادییان بۆ ئاشكرا بكات.