ئەنجوومەنی وەزیرانی هەرێمی كوردستان، پۆستێكی كۆمەڵی ئیسلامی لە حكوومەتی هەرێمی كوردستان پڕ كردەوە و بە فەرمانێك كەسێكی نوێی لە سەرۆكی دەزگەی گشتیی كاروباری مینی هەرێمی كوردستان دانا.
ئەمرۆ دووشەم19ـی ئادار، بەگوێرەی ڕاگەیەنراوێكی دەستەی كاروباری مین هاتووە، بەئامادەبوونی نیازی خالید بەڕێوەبەری گشتیی دیوان و گشتی و فەرمانبەرانی دەزگە، سیراج بارزانی وەك سەرۆكی نوێی دەزگەی مین دەستبەكاربوو.
لە ڕاگەیەنراوەكە هاتووە، سەرۆكی نوێی دەزگە لە كۆبوونەوەیەكدا لەگەڵ ستافی كارگێڕی و تەكنیكی دەزگە، تیشكی خستە سەر گرنگی دەزگە لە بواری مرۆیی و ڕۆڵی لە پاراستنی گیانی هاووڵاتییان، دواتر ناوبراو بەمەبەستی ئاگەداربوون لە كاروبارەكان، سەرجەم بەش و هۆبەكانی دیوان و سەرۆكایەتی دەزگەی بەسەركردەوە و گوێی لە پێشنیاز و داواكاری فەرمانبەران گرت.
ئاماژە دراوە، لە كاتی سەردانەكە فەرمانبەران و كارمەندان خۆشحاڵی خۆیان دەربڕی و هیوایان خواست بە هەوڵ و كۆششی هەموولایەك بتوانن خاكی پیرۆزی كوردستان لە مەترسییەكانی مین و تەقەمەنی و پاشماوە جەنگییەكان پاك بكەنەوە.
دانانی سیراج بارزانی لە شوێنی محەمەد ئەحمەدە كە پێشتر لەسەر پشكی كۆمەڵی ئیسلامی ئەو پۆستەی وەرگرتبوو، بەڵام دوای كشانەوەی حزبەكە لە حكوومەت، پۆستەكە بە بەتاڵی مایەوە و ئێستەیش كەسێكی تر لە شوێنی دانرا.