باقر جەبر زوبێدی پەرلەمانتاری دەرچووی ئەنجوومەنی نوێنەرانی عێراق ئاشكرای كرد، داعش بە وردی هەوڵ دەدا لە داهاتوویەكی نزیكدا هێرش بكاتە سەر بەغدا و بە لێشاو چەكدارانیشی لە سووریا بۆ عێراق دەگوازێتەوە.
لە پۆستێكدا لە پەڕەی فەرمی خۆی لە تۆڕی كۆمەڵایەتی فەیسبووك، باقر جەبر زوبێدی نووسیویەتی، ئێستە ماری داعش دزە دەكات و ئەوانەیشی پارەداری دەكەن، دەیانەوێ وەبەرهێنان لەسەر دۆخی سیاسی و هەڵبژاردنی عێراق بكەن، بۆیە ئێستە ڕۆژانە لە دەوروبەری سامەڕا و كەركووك جموجۆڵ و چالاكییان هەیە و هێرش دەكەنە سەر پۆلیسی فیدراڵی و حەشدی شەعبی، بەڵام ئەوان بە توندی وەڵامیان دەدەنەوە.
ئاماژەی داوە، داعش شەو و ڕۆژ كار دەكات بۆ دزەپێكردنی كادر و چەكدارانی لە ڕۆژهەڵاتی فورات لە سووریا بۆ ناوچەكانی نزیك كەركووك و دەوروبەری سامەڕا، بۆ ئەوەی لە داهاتوویەكی نزیك بەغدا بكاتە ئامانج.
ئەو قسانەی زوبێدی لە كاتێكدایە پێشتر سەرچاوە تەناهییەكانی عێراق ئاشكرایان كرد، تیرۆریستان ئۆپراسیۆنی "جەنگی بەدر" لە پارێزگاكانی باشوور و ناوەڕاستی عێراق بەرپا دەكەن و چاوەڕوان دەكرێ لە جەژن و كۆتا رۆژەكانی مانگی ڕەمەزان ژمارەیەكی زۆر كردەی تیرۆریستی ئەنجام بدەن.