بەریتانیا پڕۆژەیەكی گەورەی شوێنەواری لە كوردستان جێبەجێ دەكات

زانكۆكەیەكی بەریتانی پڕۆژەیەكی گەورەی كنە و پشكنین لە سێ ناوچەی شوێنەواری كوردستان ئەنجام دەدات و دەیەوێ تەواوی وردەكارییەكانی پڕۆژەی كەوانەی بەپیت، لەبارەی نیشتەجێبوون و كشتوكاڵا بۆ یەكەمجارە لەلایەن مرۆڤەوە ڕوون بكاتەوە.

زانكۆی ریدینگی بەریتانی سەرپەرشتیاری پڕۆژەكە لە پێگەی فەرمی خۆی بڵاوی كردووەتەوە، ئەم پڕۆژەیە بەشێكە لە پڕۆژەی "كەوانەی بە پیت"ی بەریتانی لە ڕۆژهەڵاتی ناوەڕاست  و گرنگی بە قۆناغی گواستنەوەی ژیانی مرۆڤ دەدا لە ئەشكەوتەكانەوە بۆ پێدەشتەكان و نیشتەجێبوون و دواتر داهێنانی كشتوكاڵَ و خۆماڵیكردنی ئاژەڵ.

پڕۆژەكە لە لایەن "د. روجر ماتیوس"ی پسپۆڕی بواری شوێنەوار  و هاوسەرەكەی هێنراوەتەوە كوردستان لە ماوەی پێنج ساڵ لە هەر سێ گردی شوێنەواری بێستانسوور لە سلێمانی و ئەشكەوتی زەرزی  لە ناوچەی چەمی ڕێزان  و شوێنەواری "شێخ ئاباد" لە رۆژهەڵاتی كوردستان، بەردەوام دەبێت بە مەبەستی كنە و پشكنین و شیكردنەوەی مێژوویی لە 17 هەزار ساڵ تا حەوت هەزار ساڵ پێش ئێستە.

عوسمان توفیق فەتاح مامۆستا لە زانكۆی سلێمانی بەشی شوێنەوار لەبارەی قازانج و بەرهەمەكانی ئەم پڕۆژەیە بۆ كوردستان بە "وشە"ی ڕاگەیاند، ئەم پڕۆژەیە لە هەموو ڕوویەكەوە قازانج و داهاتی دەبێت بۆ كوردستان، بۆ نموونە لە ڕووی مەعنەوییەوە ناساندنی زیاتری شوێنەوارەكان و مێژووی كوردستان بە دنیا كە ئەمەش دەبێتە هۆی هێنانی تیمی تری زانستی لە بوارە جیاوازەكانی  شوێنەواری بۆ نموونە ئەنسرۆلۆجی، پڕۆژەكەیش دەبێَتە هۆی دروستكردنی لینكی پێوەندی نێوان زانكۆكانی دنیا و بواری شوێنەواری لە كوردستان، لایەنی مادی پڕۆژە بەشێكی گرنگە بۆ كوردستان كە هەر لە سەرەتای پڕۆژەكەوە دەبێتە هۆی بووژاندنەوە و چالاك بوونی لایەنە مادییە پێوەنددارەكان دەبێتە هۆی دروستبوونی ئیش بۆ چەندان كەس.

"پڕۆژەی كەوانەی بە پیت" مەبەست لەو ناوچانەیە كە لە ئیسرائیلەوە بۆ شام و كوردستان كە زەوییەكەی بە پیتە بۆ كشتوكاڵ  و لە چاخی بەردینی نوێ كشتوكاڵی تێدا كراوە.

پڕۆفیسور رۆجر ماتیوس و تیمە شوێنەوارییەكەی ماوەی چوار ساڵە لەسەر گردی شوێنەواری بێستانسوور كاری كنە و پشكنین دەكەن و بەگوێرەی دوا لێكۆلینەوەی شوێنەواری ئەو تیمە كە بە هاوبەشی لەگەڵ بەڕێوەبەرایەتی شوێنەواری سلێمانی ئەنجام درا، دەركەوت كە بێستانسوور كۆنترین گوند یان شوێنی نیشتەجێبوونی مرۆڤە لە كوردستان.

هەولێر/سارا سەردار.


وشە - باز ئه‌حمه‌د


PM:12:11:12/06/2018




ئه‌م بابه‌ته 1646 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌