ئێوارەی ئەمڕۆ چوارشەم لەسەر بانگهێشتنی فوئاد مەعسووم، سەرۆك كۆماری عێراق و بێ ئامادەبوونی حەیدەر عەبادی سەرۆك وەزیران، كۆبوونەوەیەكی فرەوان بە بەشداری سەرانی فراكسیۆنە سیاسییەكانی عێراق دەستی پێ كرد.
سەرچاوەیەك لەوبارەوە رای گەیاند كۆبوونەوەكە لە كۆشكی كۆماری ساز كراوە و زۆرینەی سەرانی فراكسیۆنە سیاسییەكان ئامادەی بوونە، بەڵام حەیدەر عەبادی سەرۆك وەزیرانی عێراق ئامادەی كۆبوونەوەكە نەبووە.
بەپێی زانیارییەكان هەریەك لە نووری مالیكی سەرۆكی هاوپەیمانی دەوڵەتی یاسا و ئوسامە نوجێفی سەرۆكی هاوپەیمانی قەڕاڕ و عەمار حەكیم سەرۆكی هاوپەیمانی حیكمەی نیشتیمانی و زیا ئەسەدی نوێنەری موقتەدا سەدر و محەمەد كەربوولی سەرۆكی هاوپەیمانی عێراق هەویەتونا و عەبدولكەریم ئەنساری لە بری هادی عامری و كازم شمەری لە هاوپەیمانی وەتەنییە ئامادەی كۆبوونەوەكە بوونە.
سەرچاوەكە زیاتر گوتی، لەو كۆبووەدا باسی خۆپێشاندانەكانی دوایی و لێكەوتەكانی و داوكاری خۆپێشاندەران و پاڵپشتیكردنی حكوومەت و پێكهێنانی حكوومەتی نوێی عێراق و هەڵبژاردن و ئەنجامەكانی لەدوای ژماردنەوەی بەدەستی دەنگەكان دەكەن.
ماوەی 10 رۆژە خۆپێشاندانەكان لە عێراق بەردەوامن و ژمارەیەك قوربانی لێ كەوتووەتەوە و ئەوان داوای باشتركردنی خزمەتگوزارییە سەرەكییەكانی وەك ئاو و كارەبا و دابینكردنی هەلی كار دەكەن.