پەرلەمانتارێكی فراكسیۆنی گۆڕان لە ئەنجوومەنی نوێنەرانی عێراق، پێچەوانەی ئەندامانی تری فراكسیۆنی گۆڕان كە تێپەڕاندنی یاسای بودجە بە كارێكی باش بۆ هەرێمی كوردستان ناو دەبەن، ئەو پەرلەمانتارە دەڵێ، بەو شێوەیە نییە و یاسای بودجە زیانی زۆری بۆ كوردستان هەیە و منیش بە تێپەڕاندنی نیگەران بووم.
شیرین ڕەزا ئەندامی ئەنجوومەنی نوێنەرانی عێراق لە فراكسیۆنی گۆڕان بە "وشە"ی ڕاگەیاند، دەنگدانی پەرلەمانتارانی كورد بۆ پڕۆژە یاسای بودجەی گشتیی 2017ی عێراق هەڵەیە و من بەهۆی تێپەڕاندنی پڕۆژەیاساكە و دەنگپێدانی كورد نیگەران و زۆر خەمی پێوە دەخۆم.
هەروەها گوتی، لە یاسای بودجەی عێراق هاتووە دەبێ كورد جگەلە نەوت، سەرجەم داهات و پارەی گومرگەكان و داهاتە ناوخۆیییەكانیش ڕادەستی بەغدا بكات، ئەمەش مانای ئەوەیە هەرێمی كوردستان لە هەموو گەشەسەندنێك بوەستێنرێت.
هەروەها گوتی، بەغدا چاوی بە پێشكەوتنەكانی هەرێمی كوردستان هەڵنایەت، منیش هیوا دەخوازم هەرێمی كوردستان پابەندی یاسا و رێككەوتنەكە نەبێ، چونكە تەنانەت حیسابی مرۆییش بۆ هەرێمی كوردستان نەكراوە، جگەلەوەی هەندێك پارە دەنێرین بۆ مووچە، ئەی ئێمە بە چی خزمەتگوزاری و ئاوەدانی پێشكەشی خەڵكی كوردستان بكەین؟
شیرین ڕەزا ئەوەشی گوت، ئەگەر پارەی داهاتی ناوخۆ ڕادەستی بەغدا نەكەین، ئەوا لە پارەی نەوت، داهاتی ناوخۆیی كوردستانی لێ دەبڕن و ئەوەی دەمێنێتەوە پێمان دەدەن، بەم شێوەیە هیچ شتێك بۆ كوردستان نامێنێتەوە.
لە كۆتای قسەكانیدا ئەو پەرلەمانتارەی بزووتنەوەی گۆڕان گوتی، هیوادارم هەرێمی كوردستان نەوتی خۆی بە سەربەخۆیی بفرۆشێت و سەرجەم حزبەكان بەشداربن و ئاگەداری فرۆشتنی نەوت بن، بۆ ئەوەی نەكەوینە ژێر بارێكی لەم شێوەیە.
دوێنێ چوارشەم لە ئەنجوومەنی نوێنەرانی عێراق بە زۆرینەی دەنگ پڕۆژە یاسای بودجەی 2017ی عێراق پەسەند كرا و لەو پڕۆژە یاسایە، نرخی بەرمیلێك نەوت بە 42 دۆلار و كۆی گشتی بودجە بە 79 تریلیۆن و 11 ملیار 421 ملیۆن دۆلار خەمڵێنراوە و بڕی كورتهێنانیش 21 تریلیۆن دۆلارە، لە یاساكە لەسەر پێشنیازی فراكسیۆنی گۆڕان و یەكێتی و كۆمەڵ و یەكگرتوو، چەند خاڵێك لەبارەی هەرێمی كوردستان دانراوە، كە سەرجەم نەوت و داهاتە ناوخۆیییەكان و گومرگەكانی كوردستان ڕادەستی بەغدا بكەن و لە بەرامبەریشدا بەغدا تەنیا پارەی مووچە دەنێردرێ و بەهیچ شێوەیەك پارە بۆ پڕۆژەكانی خزمەتگوزاری و ئاوەدانی كوردستان نانێرێت.