له‌ ساڵیادى جینۆسایدى ئێزدییه‌كان كچێكى ترى ئێزدى ڕزگار كرا

كه‌مێك پێش ئێسته‌ كچێكى ئێزدى له‌لایه‌ن نوسینگه‌ى ڕزگاركراوانى ئێزدى ڕزگار كرا،  ئه‌مه‌ له‌ كاتێكدایه‌ كه‌ له‌ شارى دهۆك و له‌نێو كه‌مپه‌كانى ئێزدینشین چواره‌مین ساڵیادى كاره‌سات و جینۆسایدى كوردانى ئێزدى به‌ڕێوه‌ده‌چێت.

ئه‌مڕۆ هه‌ینى سێى ئاب، حسێن قائیدى، به‌رپرسى نوسینگه‌ى ڕزگاركراوانى ئێزدى سه‌ر به‌ حكوومه‌تى هه‌رێمى كوردستان به‌ "وشه‌"ى ڕاگه‌یاند، به‌ هه‌وڵ و كوششه‌كانى نوسینگه‌ى ڕزگاركراوانى ئێزدى و چه‌ند كه‌سێكى تر كچێكى ئێزدى له‌ سووریاوه‌ ڕزگار كرا.

گوتیشى، كچه‌كه‌ ته‌مه‌نى 12 ساڵه‌ و ناوى "ڕه‌هه‌ڤ سلێمانه‌" و خه‌ڵكى كومه‌ڵگاى ته‌لبه‌ناتى سه‌ر به‌ شارۆكه‌ى شنگاڵه‌ و چوار ساڵه‌ كه‌وتووه‌ته‌ ده‌ست داعش، و دواتر ڕه‌وانه‌ى سووریا كراوه‌، و سوپاس بو خوا كه‌مێك پێش ئێسته‌ ڕزگار كراو گه‌یشته‌ نێو كه‌س و كاره‌كه‌ى له‌ شارى دهۆك.

به‌پێى داتاكانى به‌رێوه‌به‌رایه‌تى كاروبارى ئێزدییه‌كان له‌ وه‌زاره‌تى ئه‌وقاف و كاروبارى ئاینى، تاكو ئێسته‌ زیاتر له‌ شه‌ش هه‌زار كه‌س له‌ ره‌فێنڕاوه‌كانى ئێزدى، سێ هه‌زار و 102 كه‌س  ماون ڕزگار بكرێن.

ڕزگار كردنى ئه‌و كچه‌ له‌كاتێكدایه‌ كه‌ ئه‌مرۆ به‌ بۆنه‌ى چواره‌مین ساڵیادى كاره‌ساتى شنگال له‌ شارى دهۆك یاده‌كه‌ له‌لایه‌ن حكوومه‌ت و كه‌س و كارى قوربانیان له‌ شارى دهۆك و ناوچه‌ ئێزدى نشین و كه‌مپه‌كان به‌ڕێوه‌ده‌چێت.

دهۆك/ نه‌وزاد هلۆرى


وشە - محەمەد میران


PM:05:49:03/08/2018




ئه‌م بابه‌ته 415 جار خوێنراوه‌ته‌وه‌‌