فڕاكسۆنی پارتی دیموكراتی كوردستان بە توندی
وەڵامی یوسف محمد و بزوتنەوەی گۆڕان دەداتەوەو دەڵێت ڕێگەنەدان بە هاتنەوەی سەرۆكی
پەرلەمان لە ئەنجامی هەڵسوكەوتی نا بەر پرسانەی ئەو كاتەی سەرۆكی پەرلەمان بوو .
دەقی ڕاگەیەندراوەكە:
جەماوەری خۆشەویستی كوردستان
ساڵێك بەر لە ئێستا لەپێناو پاراستنی ئاساییش
و سەقامگیریی كوردستان و رێگەگرتن لە گواستنەوەی فەوزا و پشێوی، رێگە بە یوسف محەممەد
نەدرا كە بێتە شاری هەولێر و دواتریش وەزیرەكانی بزووتنەوەی گۆڕان لەسەر كار لادران.
ئەو رووداوە لە دەرئەنجامی رەفتار و هەڵسوكەوتی
نابەرپرسیارانەی سەرۆكی ئەو كاتی پارلەمان بوو. لەبری ئەوەی پارلەمان شوێنی چارەسەركردنی
گرفتە سیاسییەكان و یاسادانان و بەرگریكردن لە داواكارییەكانی خەڵك بێت، یوسف محەمەد
و حزبەكەی پارلەمانیان كردە شوێنی تێكدانی تەوافوق و دروستكردنی كێشە و پیلانگێڕی لەدژی
سەقامگیریی وڵات و بەلاڕێدابردنی پرۆسەی سیاسی و كاریان بۆ دووژمنكاریی سیاسی كرد.
لە هەمانكاتدا فراكسیۆنەكەمان لە هەوڵی بەردەوامدابوو
كە یەكڕیزیی نیشتمانی بپارێزرێت و ئەو تەوافوقە تێكنەدرێت كە حكومەت و پارلەمانی لەسەر
دامەزرابوو.
تێكدانی تەوافوق و پیلانگێڕی لەدژی یەكڕیزیی
نیشتمانی لەكاتێكدابوو كە كوردستان بە درێژایی 1050 كیلۆمەتر لەگەڵ دڕندەترین رێكخراوی
تیرۆریستی لە شەڕی مان و نەماندابوو.
بەڵام ئەوان بێ ئەوەی قوربانیدانی پێشمەرگە
و بارودۆخی هەستیاری كوردستان لەبەرچاو بگرن پەلاماری بارەگاكانی پارتی دیموكراتی كوردستانیان
دا و هاووڵاتیی بێتاوانیان شەهید كرد، بۆیە دەبێ باجی تاوانەكانیان بدەن.
یوسف محەممەد و حزبەكەی دەیانەویست فەوزا و
سووتاندن و كوشتنی خەڵك بگوازنەوە بۆ هەولێر بۆیە رێگەی لێگیرا و پیلانەكانیان سەری
نەگرت.
ئێستا كە ساڵێك بەسەر ئەو رووداوە تێپەڕیوە
ئەوانەی فرمێسكی تیمساح بۆ پارلەمان دەڕێژن با گلەیی لە خۆیان و جۆری بیركردنەوەی سیاسیی
خۆیان و كۆدەتاكەیان بكەن كە پڕۆسەی سیاسیی هەرێمی كوردستانیان بەم رۆژە گەیاند و چیتر
بە بیانووی جۆراوجۆر و قسەی بێبنەما پاساو بۆ هەڵە سیاسییەكانیان نەهێننەوە.
دەبێ یوسف محەمەد و فراكسیۆنی گۆڕان دان بەوەدا
بنێن كە سەرەڕۆیانە پیرۆزیی پارلەمانیان پێشێل كرد و یوسف محەمەددیش نەیتوانی ببێتە
سەرۆكێكی بێلایەنی پارلەمان بەڵكو بووە سەرچاوەی ئاشوب و فیتنەگێڕی.
ئەو كە بە تەوافوق و بە دەنگی فراكسیۆنەكەمان
بووە سەرۆكی پارلەمان، لەجیاتی ئەوەی نوێنەرایەتیی هەموو لایەنەكان بكات بووە ئامرازێك
بۆ جێبەجێكردنی مەرام و پیلانێكی مەترسیدار.
ڕێگەچارەی كاراكردنەوەی پارلەمانیش ئەوەیە
كە سەرۆكایەتییەكی تازە بۆ پەرلەمان هەڵبژێردرێت و پارلەمان ببێتە پارلەمانی كوردستان
و مەرجەعی چارەسەركردنی كێشەكان.
فراكسیۆنی پارتی دیموكراتی كوردستان
لە پارلەمانی كوردستان
12ـی 10ـی 2016
وشە / ڕامیار جواد