لەو كاتەی سەركردەیەكی دەوڵەتی یاسا دووپاتی دەكاتەوە كە لە راگەیاندنی گەورەترین فراكسیۆنی پەرلەمانی عێراق نزیك بوونەتەوە كە حكوومەتی نوێی عێراق پێك دێنێت، شارەزایەكی عێراقی ئاشكرای دەكات كە سعوودیە و چەند وڵاتێكی تر رێگریان كردووە لە راگەیاندنی فراكسیۆنی گەورەی پەرلەمانی نزیك لە ئێران.
هیشام روكابی، بەڕێوەبەری نووسینگەی نووری مالیكی سەركردەی هاوپەیمانی دەوڵەتی یاسا ئەمڕۆ شەموو روونی كردەوە، دەوڵەتی یاسا لە گفتوگۆكانی لەگەڵ هێزە سیاسییەكان كە باوەڕیان بە زۆرینەی سیاسی و پێكهێنانی حكوومەتێكی بەهێز هەیە، بەردەوام دەبێت، روونی كردەوە، دەوڵەتی یاسا زۆر نزیكە لە پێكهێنانی فراكسیۆنی گەورەترینی پەرلەمان و ئێمە چاوەڕوانی پەسندكردنی ئەنجامی هەڵبژاردنین و واژوو لەسەر هاوپەیمانیەكان دەكەین.
لای خۆیەوە
واسق هاشمی، سەرۆكی سەنتەری عێراق بۆ لێكۆڵینەوەی ستراتیجی ئاشكرای كرد كە هەریەك لە سعوودیە و قەتەڕ و ئیمارات و توركیا لە چەند سعاتی رابردوو رێگریان كردووە پێكهێنانی فراكسیۆنێكی گەورەی پەرلەمانی عێراق نزیك لە ئێران، زیاتر گوتی، بەر لە دوو رۆژ هاوپەیمانیەتی تەوەری نیشتیمانی (سوننە خاوەن 54 كورسی پەرلەمان) لەگەڵ دەوڵەتی یاسا بە سەرۆكایەتی نووری مالیكی و فەتح بە سەرۆكایەتیی هادی عامری كۆ بووەوە و ئاماژەیان كرد كە بە 192 كورسی پەرلەمان گەورەترین فراكسیۆنی پەرلەمانن.
زیاتر گوتی، بەڵام لە هەمان شەودا پاڵەپەستۆیەكی زۆر لە دەرەوەی عێراق، بەتایبەتی لە لایەن سعوودیە و قەتەڕ و ئیمارات و توركیا خرایە سەر بەرەی سوننە بۆ پێوەندی بەستن لەگەڵ هاوپەیمانی نەسڕ بە سەرۆكایەتیی حەیدەر عەبادی و سائیروون بە سەرۆكایەتیی موقتەدا سەدر و رەوتی حیكمە بە سەرۆكایەتیی عەمار حەكیم، بۆ ئەوەی ئەوان ببنە فراكسیۆنی گەورەی پەرلەمان، بەڵام دواتر سوننە پاشەكشەیان كرد و رایان گەیاند كە سبەی یەكشەم بۆچوونی كۆتایی خۆیان رادەگەیەنن لەو بارەوە.
ئەو شارەزایە ئاماژەی كرد كە ململانێكانی سعوودیە و قەتەڕ كاری كردووەتە سەر هەڵوێستەكانی بەرەی سوننە لە عێراق، بەتایبەتی لە دیاریكردنی پۆستی سەرۆكی پەرلەمان كە هەریەك لە ئوسامە نوجێفی و محەمەد حەلبووسی كاندیدن، بۆیە ئەگەر نەتوانن یەكلای بكەنەوە رەنگە لە چەند سعاتی داهاتوودا هاوپەیمانەكە دووچاری ترازان بێتەوە.