گوتەبێژی دادگای باڵای فیدراڵی عێراق رای گەیاند كە دوای نیوەڕۆی ئەمڕۆ یەكشەم ئەندامانی دادگای باڵای فیدراڵی كۆ بوونەوە و دوای تاوتوێكردنی ئەنجامەكانی هەڵبژاردن كە لەلایەن كۆمسیۆنەوە ڕەوانەی دادگاكە كرابوو، بە كۆی دەنگ بڕیاری پەسەندكردنی درا.
پێنجشەمی رابردوو ئەنجوومەنی كۆمسیاران لە دادوەرانی نوێ كە سەرپەرشتیی پرۆسەی جیاكردنەوە و ژماردنەوەی بەدەستی دەنگەكانی سكالالێكراوی هەڵبژاردنی پەرلەمانی عێراقیان كرد، دوای یەكلاكردنەوەی تانەكان، ئەنجامی كۆتای پرۆسەكەیان بۆ دادگای فیدراڵ رەوانە كرد.
ئەمڕۆ یەكشەم بە ئامادەبوونی تەواوی ئەندامانی دادگای فیدراڵ پاش وردبینی لە ناوی كاندیدانی دەرچوو، فەرمانی دەركرد و ئەنجامی هەڵبژاردنی 12ی ئایار و ناوی كاندیدانی پەسەند كرد، بڕیارەكەیش بە كۆدەنگی بۆچوونەكان بوو دوای تاوتوێكردنی پرسەكە.