لە سایەی سزا نوێیەكانی ئەمەریكا بۆ سەر ئێران دۆخی ئابووری ئەو وڵاتە روو لە ئاڵۆزی زیاترە و سەرۆكی پێشووتری ئێرانیش وریایی دەداتە رژێمی وڵاتەكەی لە رووخان و فەشەلهێنان ئەگەر چاكسازی پێویست ئەنجام نەدا.
بەپێی لێدوانەكانی
محەمەد خاتەمی، كە ئەمڕۆ پێنجشەم لە ماڵپەڕی فەرمی خۆی لە میانی دیداری لەگەڵ ژمارەیەك دیلی ئازادكراوی جەنگی هەشتساڵەی عێراق-ئێران و ئەندامانی كۆمەڵەی كولتوور و سیاسەت لە زانكۆی شیراز بڵاوی كردوونەتەوە، ئێران پێویستی بە بیركردنەوەی نوێ هەیە و ئەگەر رژێمی ئەو وڵاتە چاكسازی قبووڵ نەكا، ئەوە بێگومان فەشەل دێنێ.
خاتەمی رەخنەی لە هێرشی پارێزگاران بۆ سەر حكوومەتی حەسەن رووحانی گرت و گوتی، لەبیرمان نەچێ كە رەوتێك هەیە هەوڵی بەستنەوەی هەموو كێشەكانی ئێران بە حكوومەت دەدا و ئەوەیش رەتكردنەوەی هەموو كارەكانی حكوومەتە، بۆیە ئەمڕۆ بۆ پاراستنی رژێمی ئێران پێویستە پاڵپشتی لە حكوومەتی رووحانی بكرێ.
خاتەمی ناراستەوخۆ رەخنەی لە عەلی خامنەیی رابەری شۆڕشی ئێران گرت و گوتی، ئەو حكوومەتەی لە رێگەی زەبر و هێزەوە دێ، حكوومەتێكی خوایی نییە تەنانەت ئەگەر حكوومەتی ئیمامی عەلی و ئیمام سادقیش بێ، لەو كاتەی حكوومەتی خوازراو ئەوەیە كە گەل لێی رازی بێ.
خاتەمی وریایی لە مەترسیداری بێمتمانەیی لە نێوان رژێم و گەلانی ئێران دا و روونی كردەوە كە ئەو حاڵەت بێئومێدی بەرهەم دێنێ و گەلی ئێران هیوای بە دواڕۆژ لەدەست دەدا و ئەگەر ئەوەیش رووی دا ئەو كات پێویستیمان بە دوژمنی دەرەكی نابێ، چونكە كۆڵەكەكانی رژێم كە پشت بە متمانەی گەل دەبەستێ، لاواز دەبێ و ئەو كاتیش رژێمەكە دەكەوێتە مەترسییەكی راستەقینەوە.
سەرۆكی پێشووی ئێران بە نائومێدییەوە ئاماژەی كرد، پێویستە هەوڵی پاراستنی رژێمەكە بدەین، رەنگە لە چاكسازیكردن لەناو رژێمەكە فەشەل بێنین، بەڵام پێویستە هەموو هەوڵێك بدەین.