لایەنەكان پێشبینی خۆیان بۆ كورسییەكان دەخەنە ڕوو
خەسرەو گۆران: پارتی 45 كورسیی پەرلەمانی كوردستان بەدەست دێنێ

وشە/ سلێمانی- هەستی كەمال

هێز و لایەنە سیاسییەكان پێشبینی بۆ بەدەستهێنانی كورسییەكانیان دەكەن لە پەرلەمانی كوردستان و ڕێژەی پێشبینیكراوی لایەنەكانیش ١٢٠ كورسیی پەرلەمانی تێپەڕاندووە، لە كاتێكدا كورسییەكانی پەرلەمان جگە لە پێكهاتەكان، ١٠٠ كورسییە.

دووەم ڕۆژی بانگەشەی هەڵبژاردنی خولی پێنجەمی پەرلەمانی كوردستان دەستی پێ كرد، هێز و لایەنە سیاسییەكانیش بە تەواوی توانایانەوە بەشداریی هەڵبژاردن دەكەن و دەیانەوێ زۆرترین كورسی بۆ خۆیان مسۆگەر بكەن.

ئەم ڕاپۆرتە پێشبینیی لایەنە سیاسییەكانی بەشدار لە هەڵبژاردنی پەرلەمانی كوردستان دەخاتە ڕوو بۆ بەدەستهێنانی كورسییەكانیان.

خەسرەو گۆران سەرۆكی دەزگەی هەڵبژاردنی پارتی دیموكراتی كوردستان، پێی وایە حزبەكەی بارودۆخی سیاسی و ڕێكخستنی لەوپەڕی باشیدایە، بۆیە پێی وایە دەنگەكانی لەم هەڵبژاردنەدا زیاد دەكات.

پارتی دیموكراتی كوردستان لە خولی ڕابردووی پەرلەماندا ٣٨ كورسیی پەرلەمانی هەبوو و بەوەش بە یەكەمی مایەوە وەك گەورەترین لیستی سیاسی لە ماوەی چوار ساڵی ڕابردوودا.

بەرپرسەكەی پارتی بۆ "وشە" ددانی بەوەدا نا كە "پێشبینی دەكەین لە سەرووی ٤٥ كورسییەوە بە دەست بهێنین، ئەوەش هەم خوێندنەوە و توێژینەوەی خۆمانە، هەم دەرئەنجامی هەڵبژاردنە پەرلەمانییەكەی عێراق پێمان دەڵێت كە ئەو ڕێژەیە بە دەست دەهێنین."

هەڵبژاردنی پەرلەمانی كوردستان لە ٣٠ی ئەم مانگەدا بەڕێوە دەچێت، سەرەڕای داخوازی هەندێك لە لایەنەكان بۆ دواخستنی، بەڵام دواجار بڕیاری بەڕێوەچوونی لە وادەی خۆیدا ڕاگەیەنرا.

بەڵێن ئیسماعیل ئەندامی ژووری هەڵبژاردنی بزووتنەوەی گۆڕان، باس لەوە دەكات كە زۆر بڕوایان بە تۆماری دەنگدەران نییە و گرەنتیش نییە بۆ ڕێگریكردن لە ساختەكاری، بەڵام دەڵێت "دەنگەكانمان زیاد دەكات".
بزووتنەوەی گۆڕان لە خولی پێشووی پەرلەماندا خاوەنی ٢٤ كورسی بوو، ریزبەندی دووەمی بە یەكێتی چۆڵ كرد و جێی گرتەوە.

بەڵێن بۆ "وشە" گوتی، "لەو بڕوایەداین ٣٠ كورسیی پەرلەمان بە دەست بێنین، ئەمە لە كاتێكدا ئەگەر هەڵبژاردنێكی بێ ساختەكاری بێت و وەك هەڵبژاردنەكانی پێشوو دەنگەكانمان بۆ لایەنەكانی تر هەژمار نەكرێن."
پەرلەمانی كوردستان خاوەنی ١١١ كورسییە و ١١ كورسی هی كۆتاكانە، هێز و لایەنە سیاسییەكانی تر كێبەركێ لەسەر ١٠٠ كورسی دەكەن.

هەژار محەمەد ئەندامی مەكتەبی هەڵبژاردنی یەكێتی، بەهەمانشێوەی لایەنەكانی تر بە"وشە"ـی ڕاگەیاند، بارودۆخی حزبەكەی لە باشیدایە و لە هەڵبژاردنی پەرلەمانی عێراقیشدا ئەوە دەركەوت كە یەكێتی دەنگەكانی لە زیادبووندایە.

یەكێتیی نیشتمانیی كوردستان لە خولی پێشوودا خاوەنی ١٨ كورسیی پەرلەمانی كوردستان بوو. ریزبەندی سێیەم هێزی گرت.

هەژار گوتی، "پێشبینی دەكەین لە سەرووی ٢٥ كورسی بە دەست بێنین، ئەوەش لەسەر بنەمای باشتربوونی بارودۆخی یەكێتی و بێ بەڵێنی هێز و لایەنەكانی تر لە بەردەم خەڵكدا."

كۆمسیۆنی باڵای سەربەخۆی هەڵبژاردن و ڕاپرسیی هەرێم، تەواوی ئامادەكارییەكانی هەڵبژاردنی كردووە و بۆ ڕۆژی دەنگدانیش ٤٠ هەزار كارمەندی بەشێوەی گرێبەست بۆ ئەو ڕۆژە دامەزراندووە.

سەلیم كۆیی ئەندامی سەركردایەتیی كۆمەڵی ئیسلامیی كوردستان، ڕای دەگەیەنێت كە ئەگەر ساختەكاریی نەكرێت، ئەوا دەنگی حزبەكەیان بە شێوەیەكی بەرچاو زیاد دەكات. كۆمەڵی ئیسلامی لە خولی پێشوودا خاوەنی شەش كورسیی پەرلەمان بوو.

كۆیی زیاتر بۆ "وشە" گوتی، "پێمان وایە لە سەرووی 10 كورسی بە دەست دێنین."

 لیستی "بەرەو ئیسڵاح" كە لە یەكگرتووی ئیسلامی و بزووتنەوەی ئیسلامی و كەسایەتی د. محەمەد بازیانی پێك دێت، پێیان وایە دەتوانن ١١ كورسیی پەرلەمانی كوردستان بە دەست بێنن.

قاسم گەڵاڵی بەرپرسی دەزگەی هەڵبژاردنی یەكگرتوو بە"وشە"ـی ڕاگەیاند، یەكگرتوو حزبێكی جێگیرە و ئەگەر لە هەڵبژاردنیشدا ساختەكاری نەكرێت، ئەوا ئەگەر دەنگەكانمان زیاد نەكەین، دەنگی خۆمان بە دەست دێنینەوە.
یەكگرتوو لە خولی پێشوودا خاوەنی 10 كورسی و بزووتنەوەش یەك كورسییان هەبوو.

گەڵاڵی گوتی، "ئەو 11 كورسییە بە دەست دێنینەوە و كار بۆ بە دەستهێنانی كورسیی زیاتریش دەكەین."


وشە - باز ئه‌حمه‌د


PM:12:44:14/09/2018




ئه‌م بابه‌ته 2948 جار خوێنراوه‌ته‌وه‌‌