ئەمڕۆ شەموو لە ئەهواز كە پارێزگایەكی عەرەبنشینە و كەوتووەتە باشووری رۆژئاوای ئێران، لە كاتی بەڕێوەچوونی نمایشی سەربازی دەستڕێژی فیشەك كراوەتە سەر هێزەكانی ئێران و بە هۆیەوە چەندان كەس كوژراون.
ئێران لە ساڵوەگەڕی شەڕی هەشت ساڵە لەگەڵ عێراق ساڵانە لە سەرەتای دەستپێكردنی پاییز هەفتەیەكی بە هەفتەی "بەرگریی پیرۆز" ناساندووە و لە شارەكان نمایشی سەربازی بەڕێوە دەبات و توانا سەربازییەكانی خۆی تاقی دەكاتەوە.
ئاژانسی "
ئیسنا" باسی لەوە كردووە كە چەند كەسێكی چەكدار لە كاتی نمایشی سەربازی دەستڕێژی فیشەكیان كردووەتە سەر هێزەكان و بەهۆیەوە ژمارەیەك كوژراون و ژمارەیەكی تر بریندار بوون.
هێرشەكە لە پشتەوەی ئەو شوێنە تایبەتییەوە ئەنجام دراوە كە بۆ بەرپرسانی سەربازی تەرخان كراوە و شوێنی هێرشەكەش لە ناوچەی لەشكری 92ی زرێهی بووە.
جێی باسە ماوە زیاتر لە ساڵێكە لە پارێزگای خووزستان چالاكی سەربازی لە دژی سوپای پاسداران و هیزەكانی تری ئێران ئەنجام دەدری و لەو ماوەیەدا چەندان هێرشی سەربازی كراونەتە سەر هێزەكانی ئێران.
هێشتا هیچ لایەنێك بەرپرسیارێتی هێرشەكەی ئەمڕۆی لە ئەستۆ نەگرتووە و میدیاكانی ئێرانیش زانیاریی وردیان لەبارەوە بڵاو نەكردووەتەوە و تەنیا بە هێرشێكی تیرۆریستی ناویان بردووە.