كریستیانۆ رۆناڵدۆی ئەستێرەی پورتوگالی سەركەوتنێكی تری پێشكەش بە یانەكەی یۆڤێنتۆس كرد لە خولی ئیتاڵیا بەرامبەر یانەی فرۆسینۆنی.
شەوی رابردوو یانەی یۆڤێنتۆس لە گەڕی پێنجەمی خولی پلە یەكی ئیتاڵیا لەنێو یاریگەی ماتوزا بووە مێوانی یانەی فرۆسینۆنی و یارییەكەشی بە 2 گۆڵی بێ وەڵام لێ بردەوە.
گۆڵی یەكەمی یانەی یۆڤێنتۆس لەلایەن رۆناڵدۆ بە لێدانێكی بەهێز لە خولەكی 81ی گێمی دووەم تۆمار كرا، گۆڵی دووەمیش لەلایەن یاریزان فیدریكۆ بێرناردیسكی لە خولەكی 94 هاتە تۆماركردن.
ئەمە سێیەم گۆڵی رۆناڵدۆ بوو لەگەڵ یانە نوێیەكەی لە وەرزی نوێی خولی ئیتاڵیا دوای ئەوەی هەفتەی رابردوو توانیبووی 2 گۆڵ لە یانەی ساسولۆ تۆمار بكات.
بەم سەركەوتنە یانەی یۆڤێنتۆس ژمارەی خاڵەكانی بۆ 15 بەرز كردەوە و هەر لە ریزبەندی یەكەمی یانەكانی خولی ئیتاڵیا مایەوە، نزیكترین ركابەریشی یانەی ناپۆلییە كە 12 خاڵی هەیە.