بە وێنە.. شانەدێری مارخنانا لە دێرەلووك بەڕێوە چوو


بە بەشداری سەدان كەس لە كریستیانەكانی كوردستان و ناوچەكە، شانەدێری مارخنانا لە شارەدیێ دێرەلووكی سەر بە شارۆكەی ئامێدی بەڕێوە چوو  و تێدا ژمارەیەك لە مسوڵمانانیش بەشدار بوون.

عەمانوئێل دخنا قەشەی دەڤەری ئامێدی بە "وشە"ی راگەیاند، ئەمڕۆ شانەدێری مارخنانا لە كەنیسەی دێرەلووك بەڕێوە چوو كە تێیدا سەدان كریستیانی كوردستان و ناوچەكە بەشدارییان كرد و هەروەها ژمارەیەك لە مسوڵمانانی ناوچەكەش بەشدارییان تێدا كرد.

ئەو گوتی، شانەدێری مارخنانا كە بە شانەدێری سەربەردەكان دەناسرێت، ساڵانە لەم رۆژانەدا دەكرێتەوە و ژمارەیەكی زۆری كریستیانی كوردستان و ناوچەكە بەشداریی تێدا دەكەن، لە رووی ئاینییەوە گرنگی خۆی هەیە و پێویستە لەسەر كریستیانەكان لەم رۆژانەدا سەرێك ئاژەڵ بكەنە قوربانی و نزا بكەن بەتایبەتی بو نەخۆشەكانیان"

ئەو قەشەیە رای گەیاند كە بە مەبەستی پتەوكردنی پێكەوەژیانی ئاینی و نەتەوەیی، ژمارەیەكی زۆری مسوڵمانەكانی ناوچەكە بەشداری لە شانەدێری ئەواندا كردووە و گوتی، "هەموو دانیشتووانی گوندەكانی ئامێدی سەردانی كەنیسەی دێرەلووكیان كردووە و بەشداری لە شانەدێرەكە دەكەن و رێوڕەسمەكانیش بە شێوازێكی باش و لە كەشوهەوایەكی ئازاددا بەڕێوە چوون"

دێرەلووك بە سەنتەری پێكەوەژیانی ئاینی و نەتەوەیی دەناسرێت، جگە لە مسوڵمان و مەسیحی، ئێستە ئێزیدییەكانیش لەوێ هەن و پێشتریش ژمارەیەك جوو هەبوون، بەڵام ئێستە نەماون.

دێرەلووك/ نەوزاد هلۆری:



وشە - سلێمان تاشان


PM:02:02:08/10/2018




ئه‌م بابه‌ته 319 جار خوێنراوه‌ته‌وه‌‌