بە سەرپەرشتی سەرۆك بارزانی 13مین پێشانگای نێودەوڵەتی هەولێر بۆ كتێب كرایەوە

ساڵانە لە هەرێمی كوردستان پێشانگای نێودەوڵەتی هەولێر بۆ كتێب دەكرێتەوە، بەڵام بەهۆی بڕیارەكانی عێراق بە داخستنی فڕۆكەخانەی نێودەوڵەتی هەولێر، ئەو پێشانگەیە بۆ مانگی تشرینی یەكەم دواخرا و ئەمڕۆ بەفەرمی كرایەوە.

ئەمڕۆ چوارشەم 10ـی تشرینی یەكەم، 13مین پێشانگای نێودەوڵەتی هەولێر بۆ كتێب كرایەوە، لە پێشانگاكەدا زیاتر لە 250 دەزگای چاپ و بڵاوكراوە تێیدا بەشدارن بە زیاتر 700 هەزار ناونیشانی كتێب و توێژینەوە كە بە چەندان زمانی جیاواز نووسراوە.

ڕەفیق كانسكی كە سەرپەرشتیاری یەكێك لە كۆمپانیاكانی بەریتانیایە بۆ "وشە" گوتی، پێشانگاكە ماوەی 11 رۆژ بەردەوام دەبێت و پێشوازی لە خوێنەرانی كتێب دەكات، بۆ ساڵی داهاتووش لە مانگی نیسان پێشانگاكە دەكرێتەوە، یانی چوار پێنج مانگی تر جارێكی تر هەولێر كتێبەكانی دنیا لە باوەش دەكات.

ساڵانە لە هەرێمی كوردستان و لە شاری هەولێر پێشانگای نێودەوڵەتی هەولێر بۆ كتێب بە سەتان هەزار ناونیشانی جۆراوجۆر دەكرێتەوە و لە چەندان وڵاتانی دنیا خانەی چاپ و بڵاوكردنەوەی كتێب بەشداری تێدا دەكەن.

لە ساڵی ڕابردوودا كتێبی هزرە سیاسییەكان و شیكارییەكان و زمانەوانییەكان پڕ فرۆشترین كتێبی پێشانگاكە بوون، جیا لەوەیش هەرێمی كوردستان ژمارەیەك كتێبی قەدەغە كردووە كە بە سەرچاوەی بیری توندڕۆیی دادەنرێن كە بەشداری لەو پێشانگایە بكەن.



وشە - رامیار جەواد


AM:10:10:10/10/2018




ئه‌م بابه‌ته 133 جار خوێنراوه‌ته‌وه‌‌