چەند رۆژێك پێش ئێستە بەرپرسی مەكۆی گۆڕانی چەمچەماڵ هەڕەشەی ڕاگرتنی ناردنی نەوت و گازی بۆ هەولێر و دهۆك كرد و پاش ئەوەی فەرماندەكانی سنوورەكە وەڵامیان دایەوە، ئێستەش فەرماندەیەكی تری پێشمەرگە داوا لە خەڵكی چەمچەماڵ دەكات بە دوای قسەی منداڵان مەكەون.
عەبدوڵا كوێخای موبارەك بەرپرسی مەكۆی چەمچەماڵی بزووتنەوەی گۆڕان و ئەندامی جڤاتی نیشتمانی ئەو بزووتنەوەیە، چەند ڕۆژێك پێش ئێستە لەپەیجی خۆی لە تۆڕی كۆمەڵایەتی فەیسبووك بڵاوی كردەوە، كە ئەوان ڕێگر دەبن لە چوونی غاز و نەوت بۆ هەولێر و دهۆك، كە كۆمپانیای دانەغازی ئیمارات لەو ناوچەی قادر كەرەم و ئەو شوێنانە كار دەكات.
قسەكانی ئەو بەرپرسەی گۆڕان كاردانەوەی زۆری بەدوای خۆیدا هێنا و خەڵكی ناڕەزایی زۆریان لە تۆڕەكانی كۆمەڵایەتی دەربڕی، هاوكات مەحموود سەنگاوی بەرپرسی میحوەری گەرمەسێری هێزی پێشمەرگەی كوردستان لەوبارەوە دوا و گوتی، ئەگەر وا بڕوا هیچ كۆمپانیایەك لە ناوچەكانی گەرمیان و سلێمانی نامێنن و وڵاتانی بیانی ناوچەی سلێمانی بە شوێنی ئارام و جێگیر نازانن، بۆیە پێویستە ئەو منداڵانەی بوێریی ناكەن بێنە سەنگەرەوە بەرگری لە خاك بكەن، دەمیان دابخەن.
هاوكات كادر شەهید نازم فەرماندەیەكی تری هێزی پێشمەرگەی كوردستان ڕوو لە خەڵكی شارۆكەی چەمچەماڵ دەكات و دەڵێ، داوا لە خەڵكی بەڕێزی چەمچەماڵ دەكەم، بە قسەی هەندێ منداڵ نەكەون، كە خۆیان نازانن داوای چی دەكەن و ئامانجیان چییە.
هەروەها ئاماژەی داوە، كە مافی ڕەوای هاووڵاتییانە بەشێوەیەكی یاسایی داوای مافەكانیان بكەن و ئێمەش پشتیوانیان دەكەین، بەڵام ناكرێ بە دوای قسەی هەندێ منداڵ بكەون كە دەیانەوێ هێمنی شارەكەمان تێك بدەن.
ئەو ئەفسەرەی پێشمەرگە كە كوڕی فەرماندەی شەهید "نازم حەمەی سلێمان"ە و لە پەیجی خۆی لە تۆڕی كۆمەڵایەتی فەیسبووك نووسیوویەتی، حەقە بپرسین سەرۆكی هەرێم و كوڕ و كەسەكانی هەموو شانبەشانی پێشمەرگە لە سەنگەری شەڕی دژ بە داعشن، پێمان ناڵێن نەوشیروان و بنەماڵەكەی و شوێنكەواتووانی لە كوێن و چیان بۆ ئەم خاكە كردووە؟ بەپێچەوانەوە ئەوان هەر فێرن قسەی زل بكەن و واز لە گەندەڵی و درۆ ناهێنن. هەموو خەمخۆری ئەم خاكە دەناسن و ئێوەش واز لە قسەی زل و درۆ و بوختان بهێنن.
جێی باسە بزووتنەوەی گۆڕان لە ساڵی 2009 دوای جیابوونەوەی لە یەكێتیی نیشتمانیی كوردستان خۆی وەك حزبێكی مەدەنی و ئاشتیخواز و دوور لە هێزی چەكداری ناساند، بەردەوامیش بەرپرسانی ئاماژە بەوە دەكەن، كە ئەوان بزاوتێكی جەماوەری و سیاسی و مەدەنین، دژ بە نادادییەكان دروست بوون، چەك و هێزیان نییە، بەڵام ئەمە چەندان جارە بەرپرسی مەكۆی گۆڕان هەڕەشەی تەقاندنەوەی بۆڕی نەوت و غازی سنوورەكە دەكات، ئەمەش بەتاڵكردنەوەی پێناسە و ناسنامەی بزووتنەوەی گۆڕانە كە خۆیان بە بزووتنەوەیەكی مەدەنی بێ چەك لە قەڵەم دەدەن.