سۆران.. كه‌مپینێك بۆ هاوكاری زیان لێكه‌وتووانی لافاو دروست كرا


به‌مه‌به‌ستی به‌ده‌نگه‌وه‌ هاتنی زیان لێكه‌وتووانی لافاوه‌كه‌ی هه‌فته‌ی رابردوو، به‌ڕێوه‌به‌رایه‌تی ئه‌وقافی سۆران كه‌مپینێكی له‌ ڕێی مزگه‌وته‌كانی سنووره‌كه‌ ئه‌نجام دا.

شه‌وی پێنجشه‌م‌ له‌سه‌ر هه‌ینی هه‌فته‌ی رابردوو، له‌ ئه‌نجامی بارینی بارانێكی به‌هێز و دروستبوونی لافاو، زیانی زۆری مادی به‌ر هاووڵاتییانی شاره‌دێی سمیلان و حاجی ئۆمه‌ران و سیده‌كان و شارۆكه‌ی رواندز كه‌وتووه‌، ئاو چووه‌ته‌ ده‌یان ماڵی ده‌ڤه‌ره‌كه‌ و لاشه‌ی ژنێكیش له‌ نێو ئاوی رووباری سیده‌كان دۆزراوه‌ته‌وه‌.

"وه‌یسی سه‌عید وه‌یسی" به‌ڕێوه‌به‌ری ئه‌وقافی سۆران له‌ لێدوانێكدا به‌ "وشه‌"ی راگه‌یاند: "وه‌ك ئه‌ركێكی ئاینی و نیشتمانی و مرۆیی، به‌ مه‌به‌ستی هاوكاری و به‌هاناوه‌چوونی زیانمه‌ندانی لافاو و بارانه‌ به‌خوڕه‌كه‌ی هه‌فته‌ی رابردوو، به‌ پێویستمان زانی هه‌ڵمه‌تێكی كۆكردنه‌وه‌ی كۆمه‌ك و هاوكاری ئه‌نجام بده‌ین، كه‌ پێكهاتووه‌ له‌ رایه‌خ، به‌تانی، كه‌لوپه‌لی خۆراكی و پێداویستییه‌كانی ناوماڵ.

زیاتر گوتی: كه‌مپینه‌كه‌ بۆ ماوه‌ی حه‌وت رۆژ به‌رده‌وام ده‌بێت، دوای ته‌واوبوونی له‌ ڕێی لیژنه‌یه‌كه‌وه‌ هاوكارییه‌كان راسته‌وخۆ ده‌گه‌یه‌نرێنه‌ ده‌ستی زیان لێكه‌وتووانی لافاوه‌كه‌ .

هه‌فته‌ی رابردوو له‌ چه‌ند ناوچه‌یه‌كی باڵه‌كایه‌تی و برادۆست به‌ شێوه‌یه‌ك لافاو دروست بوو كه‌ به‌پێی زانیارییه‌كان هیچ جارێك به‌و شێوه‌یه‌ نه‌بووه‌، به‌و هۆیه‌وه‌ زیانی مادیی زۆر به‌ خه‌ڵكی ده‌ڤه‌ره‌كه‌ گه‌یشتووه‌ و ئاو چووه‌ته‌ ناو چه‌ندان ماڵ و پردی هاتوچۆ و پیاده‌ رووخان و ره‌ز و باخی هاووڵاتییانیش زیانی زۆریان پێ گه‌یشتووه‌، ژماره‌یه‌ك ئۆتۆمبێلیش به‌ ئاودا چوون و پارچه‌پارچه‌ بوون.

سۆران/ موڕشید برادۆستی 


وشە - ڕێناس شابان


PM:03:22:03/11/2018




ئه‌م بابه‌ته 100 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌