هاتوچۆی سلێمانی دوای هەواڵێكی "وشە" داوای لێبوردنی لە هاووڵاتییان كرد


دوای ئەوەی ماڵپەڕی "وشە" هەواڵێكی بڵاو كردەوە لەسەر قوڕ و لیتەی بەردەم بەڕێوەبەرایەتی هاتوچۆی سلێمانی كە ئاستەنگی بۆ هاووڵاتییان دروست كردووە، هاتوچۆی سلێمانی داوای لێبوردنی لە هاووڵاتییان كرد و بڕیاری دا بە زووترین كات چارەسەر بكرێت.

بەردەم  بینای بەڕێوەبەرایەتی هاتوچۆی سلێمانی لە تاسڵووجە، تا ئێستە كۆنكرێت و قیر نەكراوە و لە زستان و كاتی بارانبارین دەبێتە قوڕ و لیتە و هاووڵاتییان بەهۆیەوە تووشی گرفت دەبن، لەگەڵ ئەوەشدا ناو بینای هاتوچۆ پڕ دەبێت لە قوڕ و لیتە، بەڵام دوای دوو ساڵ تا ئێستە ئەو گرفتە چارەسەر نەكراوە.

هاتوچۆی سلێمانی لە پەیجی تایبەتی خۆی لە فەیسبووك دەڵێت، نیگەرانین لەو دۆخەی كە بەهۆی بارانەوە لە بەردەم بینای هاتوچۆ دروست بووە و داوای لێبوردن لە هاووڵاتییان دەكەین و بە زووترین كات ئەو كێشەیە چارەسەر دەكەین.

لای خۆیەوە كاروان محەمەد گوتەبێژی هاتوچۆی سلێمانی بە "وشە"ی ڕاگەیاند، زەوییەكە موڵكی هاتوچۆ نییە و هی شارەوانییە، لە لایەن كۆمپانیایاكەوە دەست كراوە بە ئیشكردن تێیدا بۆ ئەوەی بكرێتە گۆڕەپانێكی فراوانی وەستانی  ئۆتۆمبێلی هاووڵاتییان، چونكە بە زستاندا دەبێت قوڕ و لیتە و گرفت دروست دەبێت.

گوتی، دەبوو پێش ئەوەی هاتوچۆ بگوازرێتەوە بۆ تاسڵووجە، ئەو گۆڕەپانی وەستانی ئۆتۆمبێلە دروست بكرایە تا بەو شێوەی ئێستە تووشی گرفت نەبین.

بۆ بینینی هەواڵی پێشووی "وشە" کلیک بکە


سلێمانی/ هۆشیار عەلی



وشە - سلێمان تاشان


AM:11:24:08/11/2018




ئه‌م بابه‌ته 96 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌