به‌ وێنه‌.. شه‌قامى ئیسكان چۆڵ ده‌كرێ

تا ئێسته‌ نۆژه‌نكردنه‌وه‌ى شه‌قامى ئیسكانى شارى هه‌ولێر به‌رده‌وامه‌ و ئێواره‌ى ئه‌مڕۆیش ئه‌و عاره‌بانه‌ و ده‌ستگێڕانه‌ له‌ شه‌قامه‌كه‌دا لابران كه‌ ڕاگیرابوون، ئه‌وه‌یش دواى ئه‌وه‌ بڕیار دراوه‌ كه‌ له‌گه‌ڵ نۆژه‌نكردنه‌وه‌ى شه‌قامه‌كه‌ شوێنێكى گونجاو بۆ فرۆشیاره‌كان دابین بكرێ.

نێردراوى "وشه‌" له‌ شه‌قامى ئیسكان كۆمه‌ڵێك وێنه‌ى چۆڵكردنى شه‌قامه‌كه‌ى له‌لایه‌ن عاره‌بانه‌ و ده‌ستگێڕه‌كانه‌وه‌ ناردووه‌ و ئاماژه‌ى بۆ ئه‌وه‌ كرد كه‌ ئێواره‌ى ئه‌مڕۆ هه‌ڵمه‌تى لابردنى ئه‌و عاره‌بانانه‌ له‌لایه‌ن شاره‌وانى و قایمقامییه‌ته‌وه‌ ده‌ستى پێ كردووه‌.

پێشتر مه‌ڕوان هادى سه‌رۆكى شاره‌وانى یه‌كى هه‌ولێر به‌ "وشه‌"ى ڕاگه‌یاندبوو كاركردن له‌ شه‌قامى ئیسكان به‌رده‌وامه‌ و شه‌قامه‌كه‌ به‌شێوه‌یه‌كى مۆدرێن نۆژه‌ن ده‌كرێته‌وه‌.

ئه‌و ڕوونى كرده‌وه‌ كه‌ به‌شێوازێكى ڕێكتر شوێنى عاره‌بانه‌ و مێزى فرۆشیاره‌كان دابین ده‌كرێ، به‌ڵام تا ته‌واوبوونى نۆژه‌نكردنه‌وه‌كه‌ ناتوانن ڕێكخستنه‌وه‌ بۆ ئه‌و كاره‌ بكه‌ن.

سه‌رۆكى شاره‌وانى یه‌ك دووپاتى له‌وه‌ كرده‌وه‌ كه‌ 480 ملیۆن دینار بۆ نۆژه‌نكردنه‌وه‌ى شه‌قام و شۆسته‌كه‌ دانراوه‌، جگه‌ له‌ ئاوه‌ڕۆى شه‌قامه‌كه‌، پڕۆژه‌كه‌یش ناوه‌ڕاستى مانگى ئه‌یلوول كۆتایى دێت.

شه‌قامى ئیسكان له‌ هه‌ولێر كه‌ یه‌كێكه‌ له‌ بازاڕه‌ ناسراوه‌كانی شه‌و له‌سه‌ر ئاستی عێراق، دواى زیاتر له‌ 18 ساڵ له‌ فراوانبوونی قه‌ره‌باڵخی شه‌وان، ئێسته‌ تێكدراوه‌ و جارێكى تر نۆژه‌ن ده‌كرێته‌وه‌.