تره‌مپ به‌هۆى شه‌ڕى دیواره‌وه‌ سه‌ردانى داڤۆس ناكات

دۆناڵد تره‌مپ، سه‌رۆكى ئه‌مه‌ریكا ڕای گه‌یاند، كه‌ ئه‌مساڵ به‌شدارى له‌ كۆڕبه‌ندى ئابوورى نێوده‌وڵه‌تى له‌ داڤۆسى سویسرا ناكات.

میدیاكان به‌پێى تویته‌كه‌ى تره‌مپ ئاشكرایان كردووه‌، كه‌ نه‌ڕۆیشتنى تره‌مپ به‌هۆى شه‌ڕى نێوان ئه‌و و دیموكراتییه‌كانه‌ له‌ باره‌ى بایه‌خى گه‌وره‌ى ئاسایشى سنوور، بۆیه‌ گه‌شته‌ زۆر گرنگه‌كه‌ى بۆ داڤۆس ئه‌نجام نادات.

ئه‌مه‌یش دواى ئه‌وه‌هات كه‌ دانوستانەکانی نێوان سەرۆکی ئەمه‌ریکا، دۆناڵد ترەمپ و ئەندامە بە ئەزموونەکانی دیموکراتەکان لە کۆنگرێس سەبارەت بە دووبارە دەستبەکاربوونەوەی حکوومەت بێ ئەنجام کۆتاییهات.

ترەمپ ڕەخنەی لە دیموکراتەکان گرت کە دژی دابینکردنی پێنج ملیار و 700 ملیۆن دۆلارن لە بوودجەدا بۆ بنیاتنانی دیواری سەر سنووری مەکسیک، لە کۆشکی سپیش لەگەڵ هەریەک لە سەرکردەی کەمینەی دیموکراتەکان لە ئەنجوومەنی پیران، چەک شۆمەر و سەرۆکی ئەنجوومەنی نوێنەران، نانسی پێلۆسی کۆبوویەوە.

ڕۆژى چوارشه‌مى ڕابردوو، دیموكراته‌كان ڕازى نه‌بوون پێنج ملیار و 700 ملیۆن دۆلار بۆ بنیاتنانى دیوارى جیاكه‌ره‌وه‌ى سنوورى مه‌كیسیك ته‌رخان بكه‌ن، ئه‌مه‌یش بووه‌ته‌ هۆى په‌كخستنى حكوومه‌ت.


وشە - محەمەد میران


AM:09:45:11/01/2019




ئه‌م بابه‌ته 133 جار خوێنراوه‌ته‌وه‌‌