سووریا.. ئەردۆغان بەرەی نەسڕە دەكاتە حزبوڵایەكی تر


لە یەكێك لە هەنگاوەكانی توركیا بۆ بەهێزكردنی بوونی هێزەكانی لە باكوری سووریا، راپۆرتەكانی راگەیاندنی رووسیا ئاماژە دەكەن كە ئەنكەرە دەیەوێت "دەستەی ئازادكردنی شام"، واتە "بەرەی نەسڕە"ی پێشوو كە لقی سووریای رێكخراوی قاعیدەیە، بیكات بە بزووتنەوەیەكی سیاسی بە هاوشێوەی میلیشیای حزبوڵای لبنانی كە لەلایەن ئێرانەوە دروستكراوە و پاڵپشتی دەكرێت و كار بۆ بەرەژەوەندییەكانی ئێران لە ناوچەكە دەكات. 

سەرچاوەیەك لە ئۆپۆزسیۆنی سووریا لە دەستەی دانووستانەكان رای گەیاند، ئەو پلانەی توركیا بریتییە لە یەكخستنی چەكدارانی سەر بە بەری نەسڕە، كە بە رێكخراوێكی تیرۆریستی پۆلێن كراون، لەگەڵ بەرەی نیشتیمانی، كە سوپایەكە و لەلایەن توركیاوە دامەزراوە لە یەكخستنی ژمارەیەك گرووپی چەكداری بەرهەڵستكار لە باكوری سووریا. زیاتر گوتی، ئێستە توركیا خەریكی رێكخستنی دیدارە لە نێوان نوێنەرانی هاوپەیمانی نێودەوڵەتی دژ بە داعش و بەرەی نیشتیمانی بۆ رێككەوتن لەسەر ئامادەكاری تایبەت بە یەكخستنی بەرەكە لەگەڵ سوپاكەدا.  

ئەو سەرچاوەیە ئاشكرای كرد كە ئەمەریكا بە توركیای راگەیاندووە كە كێشەی لەگەڵ هیچ پڕۆژەیەكی توركیا لە باكوری سووریادا نییە، بەو مەرجەی بەرژەوەندییەكانی كورد لەبەرچاو بگیرێت، لەو كاتەی ئەنكەرە خەریكی زیندووكردنەوەی بیرۆكەی دامەزراندنی ئەو سوپایە و كاراكردنیەتی لە چوارچێوەی پلانێك بۆ دامەزراندنی ناوچەیەكی ئارام لە باكوری سووریا.

مەبەستی سەرەكیی ئەنكەرە لە گۆڕینی بەرەی نەسڕە بۆ رێكخراوێكی سیاسی بریتییە لە بازدان بەسەر ناڕەزایەتییەكانی رووسیا لەبارەی مانەوەی بەرەكەی و رێكخراوەكانی تر كە بە تیرۆریستیان لەقەڵەم دەدات لە باكوری سووریا، لەو كاتەی بەمدواییە رووسیا ئاشكرای كرد كە ئامادەسازی بۆ ئەنجامدانی ئۆپراسیۆنێكی سەربازی دەكرێت لە پارێزگای ئیدلب و دووپاتی كردەوە بەوەی رێگە بە مانەوەی ناوچەی پارێزگاریكردن لە تیرۆر لەو پارێزگایە نادات، وەك ئاماژە بۆ ئەو ناوچە ئارامەی ئیدلب كە بەرەی نەسڕە كۆنتڕۆڵی دەكات.

لای خۆیەوە توركیا سوودی لە گفتوگۆكانی ئەستانە وەرگرت و ئیدلبی خستە ناو ناچەكانی ئارامكردنەوە، ئەوەیش لەپێناو بەهێزكردنی بوونی سەربازی خۆی لەو پارێزگایەدا، جیا لە دامەزراندنی چەندان خاڵی چاودێریكردنی سەربازی لە ئیدلب و پاڵپشتیكردنی گرووپە چەكدارەكانی نزیك لەخۆی، بۆیە ئەنكەرە هەوڵی هێشتنەوەی بەرەی نەسڕە و پێدانی مۆركێكی سیاسیانە پێی دەدات، ئەوەیش لەپێناو هێشتنەوەی دەسترۆیشتووی خۆی لە باكوری سووریا. 

سەرەڕای ئەوەی دەسەڵاتدارانی توركیا بەفەرمی بەرەی نەسڕەیان وەك رێكخراوێكی تیرۆریستی داناوە، بەڵام چەندان سەرچاوە ئەنكەرە بە پاراستنی پێوەندییەكانی لەگەڵ رێكخراوەكە تۆمەتبار دەكەن و ئەوەیش لەلایەن ئەبو محەمەد جۆلانی سەركردەی نەسڕە دووپات كرایەوە كاتێك دانی بە مافی توركیا نا بە ئەنجامدانی ئۆپراسیۆنێكی سەربازی لە رۆژهەڵاتی فورات لەدژی كوردی سووریا و پاڵپشتیكردنی ئەنجامدانی ئۆپراسیۆنێكی نوێیش بە هاوشێوەی پێشوو لە باكوری سووریا، واتە بە هاوشێوەەی دوو ئۆپراسیۆنی "قەلغانی فورات" و "چڵە زەیتوون" و گوتی، ئێمە لەگەڵ بۆچوونی توركیاین بە پێویستی ئازادكردنەوەی ناوچەی رۆژهەڵاتی فوراتین.

جۆلانی مانگی رابردوو لە دیدارێك زیاتر گوتی، پارتی كرێكارانی كوردستان دوژمنی شۆرشە و دەستی بەسەر ناوچەیەكدا گرتووە كە ژمارەیەكی زۆر لە عەرەب و سوننەی تیادا دەژین، بۆیە بەپێویستی دەزانین ئەو حزبە لەناوبچێت. لەو كاتەی چاودێران پێیان وایە كە ئەو قسانەی جۆلانی بوونی پێوەندییەكی قووڵی لەگەڵ توركیا ئاشكرا دەكات كە بێگومان بەرجەستەی وەفاداری بۆ توركیا و جۆرێكیش لە چاكەدانەوە بۆی دەكات.

چاودێران دەڵێن كە هەوڵەكانی ئەردۆغان بوو كە لە رێگەی رێكەوتننامەی سووچی جەنگێكی لەدژی ئەو گرووپە لە ئیدلب وەستاند بۆ پاراستنی بەرەی نەسڕە و ئەوان ئاماژە بۆ پێوەندی و وابەستە ئایدۆلۆجییەكانی نێوان پارتی داد و گەشەپێدانی فەرمانڕەوا لە توركیا و بەرەی نەسڕە دەكەن. هاوكات ئەو بۆ شاردنەوەی ئەو پێوەندییە ناراستەوخۆ لە رێگەی قەتەڕەوە پاڵپشتی لێ دەكات.

كەمال جەفا، شارەزای سیاسی لەو بارەوە دەڵێت، سوپای سووریا ئامادەیە بۆ هێرشكردنە سەر ئیدلب، بەڵام كاتی زیاتری بە رووسیا داوە بۆ گفتوگۆكردن لەگەڵ توركیا كە تا ئێستە بگرە و بەردە دەكات و كات دەكوژێت و گرەوە لەسەر ئەنجامدانی كودەتایەك بەسەر رووسیا ئێران دەكات و سەربازیانە كۆنترۆڵی ناوچەكانی نێوان كۆبانی  و مالكییە و دەرباسییە و سەری كانی و گرێ سپی بكات، بەڵام تا ئێستە گڵۆپی سەوزی لەلایەن ئەمەریكا و رۆژئاوا بۆ هەڵنەكراوە، بۆیە ئەوەی توركیا لە باكوری سووریا ئەنجامی دەدات ئاماژەیەكە بۆ ئەوەی راستگۆ نەبووە لەگەڵ هاوپەیمانەكانی و ئەو دەیەوێت باكوری سووریا بۆخۆی داببڕێت و دەستیشی بە پرۆسەی بەتوركیكردنی ئەو ناوچانە و سەپاندنی ناسنامەی نوێ بۆیان و مامەڵەكردن بە لیرەی توركی و خوێندن بە پڕۆگرامی توركی لەژێر ناوی رووبەڕووبوونەوەی پەكەكەوە كردووە.       



وشە - مه‌حموود ئیسماعیل


PM:08:05:12/02/2019




ئه‌م بابه‌ته 148 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌