لافاو 11 پارێزگای ئێرانی گەمارۆ داوە

ئەمڕۆ سێشەم بارانی زۆر و هەستانی لافاو 11پارێزگای  ئێران و رۆژهەڵاتی کوردستانی تووشی مەترسی کردووە و پۆلیسی هاتوچۆی ئێرانیش رای دەگەیەنێت 61رێگای سەرەکی و بەستنەوەی شارەکان بە هۆی لافاو پچڕاون.

مورتەزا سەلیمی سەرۆکی رێکخراوی فریاکەوتنی مانگی سووری ئێران باسی لەوە کردووە هەر یەک لە پارێزگاکانی ئیلام، پاریزگای خوراسانی باشوور، خوراسانی رەزەوی و خوراسانی باکوور، زەنجان، سیستان و بەلووچستان، فارس، کرمان، گوڵستان، هورمزگان و یەزد ئاوی رووبارەکان بەرز بووەتەوە و لافاویش لە بەشێک لەم پاریزگایانە هەستاوە.

ئەو باسی لەوەش کرد کە یارمەتی و بەهاناوەچوونەکان گەیشتووەتە 105 شار و گوند و بە گشتی 14 هەزار کەس یارمەتی پێویستیان پێ گەیشتووە.

ئەمە یەکەم لافاو نییە لەو ماوەیەدا لە ئێران روو دەدات بەڵکوو هەفتەی رابردووش لافاو چەند شارێکی پاریزگای لوڕستانی نوقمی ئاو کرد و زیانێکی زۆریشی بە پاریزگای خووزستان گەیاند.

بەگوێرەی "رادیۆ فەردا" هێشتا پارێزگای لوڕستان و خووزستان لە ژێر کاریگەری لافاوەکە دان و بەشێکی زۆر لە دانیشتووان و لیقەوماوانی لافاو یارمەتی و فریاگوزارییان پێ نەگەیشتووە.

لە ئێران هەندێک دەنگۆ بڵاو کراوەتەوە لەبارەی رووخانی چەند بەنداوێکی ئەفغانستان و گەیشتنی ئاوی ئەو بەنداوانە بە ئێران بەڵام بەرپرسانی ئێران ئەمەیان رەت کردووەتەوە و گوتووشیانە ئەو ئاوەئی لە رووبارەکانی ئەفغانستانەوە دەڕژێنە ئێران بە تەواوی کۆنتڕۆڵ کراون.

ئەمڕۆ سێشەم باران لە زۆربەی پارێزگاکانی ئێران بە تایبەتی رۆژهەڵاتی کوردستان دەست پێ دەکاتەوە و  بۆ ماوەی چەند رۆژ بەردەوام دەبێت ولە  زۆربەی پارێزگاکانی ئێران باران دەبارێت.