وەزارەتی دارایی و ئابووریی حكوومەتی هەرێمی كوردستان، بڕیارێكی نوێی بۆ فەرمانبەرانی حكوومەتی هەرێمی كوردستان سەبارەت بە ماوەی گواستنەوەی كاتی "تەنسیب" دەردەكات.
بەپێێ بڕیارێكی وەزارەتی دارایی و ئابووری حكوومەتی هەرێمی كوردستان كە ئەمڕۆ یەكشەم 21ـی نیسان بڵاو كراوەتەوە و "وشە" وێنەیەكی دەست كەوتووە، ماوەی تەنسیبكردنی فەرمانبەران یەك ساڵەو دەكرێت ساڵێكی تریش نوێ بكرێتەوە.
لە بەشێكی نووسراوەكە ئاشكرا كراوە، لە كاتی تەنسیبكردنی فەرمانبەر بۆ فەرمانگەیەكی تر، سەرجەم مووچە و دەرماڵەكانی لە فەرمانگە بنەڕەتییەكەی خۆی بۆ خەرج دەكرێ و تەنها ئەو مووچەیە وەردەگرێت لە شوێنی پێشوو وەری دەگرت و نەوەكو ئەو دەرماڵەیەی لە شوێنی تەنسیب كراو هەیە.
ئاماژە بەوەش كراوە، فەرمانبەر بەپێی گشتاندنی ساڵی 2014 سەرجەم مووچە و دەرماڵەكانی 12 مانگی بۆ خەرج دەكرێت.
ئەو نووسراوەی وەزارەتی دارایی و ئابوووریی حكوومەتی هەرێمی كوردستان ئاڕاستەی گەنجینەی هەولێر كراوە كە پێشتر بەهۆی نەبوونی میلاك لە هەندێك شوێنی وەزارەتەكان گواستنەوەی بەشێوەی كاتی هەبوو كە فەرمانبەران داوای بڕی دەرماڵەی ئەو شوێنەیان دەكرد.