بەیانی ئەمڕۆ یەكشەم هەشت هێرشی تیرۆریستی كرایە سەر چەند هوتێل و كڵێسایەكی سریلانكا كە سەرقاڵی رێوڕەسمی جەژنی زیندووبوونەوە بوون، جەژنێكی هاوبەشی كریستیان و جووە، بەو هۆیەوە تا ئێستە 207 كەس گیانیان لەدەست داوە و نزیكەی 500ی تریش بریندارن و ئامارەكە لەگۆڕاندایە، ئەو هێرشانەی كاردانەوەیەكی گەورەی ناوخۆیی و جیهانی لێ كەوتەوە.
روان گۆناسیكیرا، گوتەبێژ بەناوی پۆلیسی سریلانكا ئاماژەی كرد كە بەیانی ئەمڕۆ یەكشەم شەش تەقینەوە سێ كڵێسا و سێ هووتێلیان كردووەتە ئامانج، بەر لەوەی دوو ناوچەی تریش كەوتنە ژێر هێرش، ئەو گوتەبێژە رای گەیاند كە ژمارەی كوژراوان گەیشتووەتە 207 كەس و 450 برینداریش هەیە، وەك "رۆیتەرز"، بڵاوی كردەوە.
دوو هوتێل و كڵێسایەكی هێرشیان كردووەتە سەر دەكەونە كۆڵۆمبۆی پایەتەخت و كڵێسایەكیشیان دەكەوێتە نیگۆمبۆ لە باكوری پایەتەخت، جیا لە كڵێسای سێیەم كە دەكەوێتە باتیكالۆ لە رۆژهەڵاتی ئەو وڵاتە، بەپێی ئاژانسی "فرانس پرێس"، لە نێوان كوژراواندا 35 بیانی هەن و ژمارەیەك ئوسترالی و دوو توركیان تیادایە. دوای تەقینەوەكە دەسەڵاتدارانی ئەو وڵاتە قەدەغەی هاتوچۆیان بۆ ماوەی 12 سەعات راگەیاند و تۆڕە كۆمەڵایەتییە سەرەكییەكان و چاتیان راگرت.
لەبارەی ئەو لایەنەی بەرپرسە لە تەقینەوەكان، وەزیری كاروباری بەرگری سریلانكا دەڵێت، تەقینەوەكان كارێكی تیرۆریستین و گرووپە توندڕۆكان ئەنجامیان داوە، لەو كاتەی حكوومەت دەڵێت هەموو هێرشەكان خۆكوژی بوونە و یەك گرووپ ئەنجامی داوە، میدیاكانی ئەو وڵاتەش باسی گرتنی حەوت گومانلێكراو دەكەن و سێ سەربازیش لەكاتی هەڵكوتانە سەر گومانلێكراوان كوژراون.
سریلانكا كە خاوەن زۆرینەیەكی دانیشتوانی بووزییە، كەمینەیەكی كریستیانی كاسۆلیكی تیادا دەژیت ژمارەیان دەگاتە 1.2 ملیۆن كە لە كۆی دانیشتوانی ئەو وڵاتە كە ژمارەی دانیشتوانی 21 ملیۆن كەسە، وەك "فرانس پرێس"، ئاماژەی بۆ كرد، لەو ژمارەیە بووزییەكان 70%ی دانیشتوانی ئەو وڵاتە پێكدێنن و 12%ی هیندۆسە و 10%ی موسڵمان و 7%ی كریستیانن كە لە تامیل و سنهالییەكان پێك هاتوون.
بەشێك لە كریستیانەكان لەو وڵاتە دووچاری نەیاری هاتوونەتەوە بەهۆی پاڵپشتیان بۆ لێكۆڵینەوەی دەرەكی لە تاوانەكانی سوپای سریلانكا لەدژی تایفەی تامیل لە كاتی جەنگی ناوخۆیی ئەو وڵاتە كە لە 1983 دەستی پێ كرد و لە 2009 كۆتای هات و لەو ماوەیەدا 80-100 هەزار كەس كوژران، وەك نەتەوە یەكگرتووەكان رایگەیاند.
ساڵانێكی دوورودرێژە سریلانكا ئەو دوورگەیەی كەوتووەتە سەر زەریای هیندی لە هەوڵی كۆكردنەوەی نەخشە لێكترازاوەكەیەتی لە نێوان بەرەی پڵنگەكانی تامیل و حكوومەتی ئەو وڵاتە لەلایەك و رووبەڕووبوونەوەی خوێناوی نێوان بووزییەكان و موسڵمانەكان لەلایەكی ترەوە. لە 2009 حكوومەتی سریلانكا كۆتاهاتنی جەنگی ناوخۆیی جیاخوازی درێژخایەنی بەرەی رزگاریخوازی پڵنگەكانی تامیل "ئیلام"، راگەیاند دوای سەركەوتنی سوپای ئەو وڵاتە لە لەناوبردنی و كوشتنی سەركردەكەی لە ئایاری 2009.
رەگوریشەی جەنگی ناوخۆیی سریلانكا بۆ 1983 دەگەڕێتەوە ئەو كاتەی ململانێی چەكداری لە نێوان سوپا و پڵنگەكانی تامیل دروست بوو كە ویستیان دەوڵەتێكی سەربەخۆ بۆ تامیلیەكان دامەزرێنن بەناوی "ئیلام تامیل"، لە باكور و رۆژهەڵاتی دوورگەكە. بۆیە دوای 26 ساڵ لە رووبەڕووبوونەوەی چەكداری ژمارەی قوربانیان بە دەیان هەزار خەمڵێندرا. بەهۆی ئامرازەكانی جەنگی پڵنگەكانی تامیلیشەوە، 32 دەوڵەت وەك رێكخراوێكی تیرۆریستیان لەقەڵەم دا لەوان ئەمەریكا و هیندستان و كەنەدا و یەكێتی ئەوروپا.
لە 1987 تا 1991 سوپای هیندستان ویستی لە رێگەی هێزەكانی ئاشتی پارێزەوە دەست بخاتە ناو سریلانكا، بەڵام نەیتوانی، تا رێككەوتننی ئاگربەست لە 2001 هاتە سازكردن، بەڵام لە 2006 جەنگ دەستی پێ كردەوە و كۆتایی بە رێككەوتننەكە هات و جەنگەكە لە 2009 بە سەركەوتننی سوپای ئەو وڵاتە كۆتایی هات.
ئەو رووداوەی ئەمڕۆی سریلانكا هەستێكی شۆك و ناخۆشی لای زۆرینەی سریلانكییەكان لەكاتی ئاهەنگێڕای كریستیانەكان دروست كرد، جیا لەوەی تەقینەوەكان كاریگەری ئابووری بۆسەر ئەو وڵاتە دەبێت كاتێك كەرتی گەشتیاری و وەبەرهێنانی دەرەكی روو لە سستی دەكەن. چونكە ئەو وڵاتە وەك سەرچاوەی داهاتی سەرەكی پشت بە گەشتیاری دەبەستێت و كۆمپانیای "لۆنلی پلانێت"، گەورەترین كۆمپانیای گەشتیاری لە دنیا وەك باشترین شوێنی گەشتیاری دیاری كردبوو بۆ 2019 و چاوی لە بووژاندنەوەی وەبەرهێنان بوو لە كەرتی هووتێل و شارە گەشتیارییەكان بۆ راكێشانی گەشتیاری زیاتر و بەرزكردنەوەی بەهای پشكەكانی لە دنیا.
سریلانكا لە 2017 پێشوازی لە 2.1 ملیۆن گەشتیار كرد و دەستەی پەرەپێدانی گەشتیاری لەو وڵاتە رای گەیاند كە دەیانەوێ ژمارەی گەشتیارانی بیانی بگەیەننە چوار ملیۆن تا 2020، لەوكاتەی لە ئازاری رابردوو بەتەنیا 244 هەزار گەشتیاری بیانی روویان لەو وڵاتە كردووە، جیا لە گەشتیاران تەقینەوەكان مەترسی بۆ سەر كەرتی وەبەرهێنانی بیانی دەبێت.