کوردستان چارەسەرێکی شارستانییانەی پێ نییە بۆ ئاژەڵە سەرگەردانەکان

لەناو‌ شاری سلێمانی و به‌تایبه‌ت له‌ كۆڵان و گه‌ره‌كه‌كانی ده‌ره‌وه‌ی شه‌قامی شه‌ست مه‌تری سه‌گی به‌ره‌ڵا به‌شێوه‌ی فراوان زیادبوون و هه‌ندێكیان په‌لاماری هاووڵاتییان ده‌ده‌ن، به‌ڵام تا ئێستا شوێنێك بۆ ئه‌و سه‌گانه‌ دابین نه‌كراوه‌ و هیچ بەڕێوەبەرایەتییەک بەرپرسیارێتییەکەی بە ئەستۆ ناگرێت.

له‌ وڵاتانی دنیا و زۆربەی وڵاتانی رۆژهەڵاتی ناوەڕاست شارەوانییەکان بە هاوکاری رێکخراوەکانی پارێزەری مافی ئاژەڵ و ڤێتەرنەرییەکان شوێنی تایبەت بۆ حەوانەوەی ئەو ئاژەڵانە دابین دەکەن کە لەناو شارەکاندا بەڕەڵا کراون و لەرووی خۆراک و پزیشکییەوە خزمەت دەکرێن، بەڵام تا ئیستە لە کوردستان بە رێگەیەکی ناشارستانی مامەڵە لەگەڵ ئەو ئاژەڵانە دەکەن و تاکە چارەسەری بڵاونەبوونەوەیان لەناو کۆڵانەکان لەلایەن بەرپرسانی ئیداری ژەهراویکردن یان کوشتنیانە بە فیشەک.

نەبوونی پلانێکی گونجاو بۆ چارەسەرکردنیان وای کردووە رۆژ لەدوای رۆژ ژمارەی سەگی بەڕەڵا لەناو شەقام و کۆڵانەکانی سلێمانی و سەرجەم شارەکانی کوردستان زیاد بکەن و ببنە مایەی بێزاری و ترس بۆسەر هاووڵاتییان، هاوکات لەبەر ئەوەی لەلایەن بەڕێوەبەرایەتی ڤێتەرنەرییەوە دەرزییان لی نادرێت، مەترسوی ئەوەیان لەسەرە لەناو شاردا نەخۆشی کوشندە بڵاو بکەنەوە.

شارەوانی سلیمانی خۆی لەو پرسە دەردەهاوێت و بەرپرسیارێتییەکەی دەخاتە سەر بەڕێوەبەرایەتییەکی تر، سه‌رده‌شت ره‌فیق، به‌ڕێوه‌به‌ری راگه‌یاندنی شاره‌وانی سلێمانی بۆ‌ "وشه‌" دەڵێ، ئه‌و بابه‌ته‌ له‌ هیچ لایه‌نێكه‌وه‌ پێوه‌ندی به‌ شاره‌وانی سلێمانی نییه ‌و پێوه‌ندی به‌ ڤێته‌رنه‌ری هه‌یه‌ و ئه‌وان ده‌بێت كار له‌سه‌ر ئه‌و دیارده‌یه‌ بكه‌ن.

لەبارەی دیاریکردنی شوێنێک بۆ داڵدەدانیان لەڕووی ئیدارییەوە روونی دەکاتەوە، دیاریكردنی شوێن بۆ ئه‌و سه‌گانه‌ له‌ ده‌ره‌وه‌ی شار پێوه‌ندی به ئێمه‌وە نییه‌ و شاره‌وانی لایه‌نی پێوه‌ندیدار نییه له‌و بابه‌ته‌.

هۆشیار ئیسماعیل، بڕیارده‌ری لیژنه‌ی ژینگه‌ و ته‌ندروستی له‌ ئه‌نجوومه‌نی پارێزگای سلێمانی به‌ "وشه"‌ی راگه‌یاند، دیارده‌كه‌ له‌ سلێمانی چاره‌سه‌ركردنی تێپه‌ڕاندووە و ناتوانرێ کۆنتڕۆڵی ئه‌وهه‌موو سه‌گه‌ به‌ڕه‌ڵایه‌ بکرێت.

ئەو بڕیاردەرەی ئەنجوومەن دووپات لەوە دەکاتەوە، به‌هۆی ئه‌وه‌ی ساڵانه‌ له‌ رێگه‌ی زاوزێوه‌ ژماره‌یان له‌ زیادبون و فراوانبووندایە، ئه‌و سه‌گانه‌ بونه‌ته‌ كێشه‌ و په‌لاماری هاووڵاتییانیش ده‌ده‌ن، ئه‌گه‌ر ڤێته‌رنه‌ری له‌ رێگه‌ی ده‌رزییه‌وه‌ بیانكوژێت هه‌ڵا دروست ده‌بێت و ئه‌گه‌ر ئه‌و كاره‌ش نه‌كات رووبه‌ڕووی هاووڵاتییان ده‌بنه‌وه‌.

تا ئێستەش لەلای ئیدارەی هەرێمەوە ریگەی سێیەم بۆ چارەسەری ئەو بابەتە مرۆییە هەنگاوی بۆ نەنراوە و تەنیا دوو چارەسەر بۆ پرسی ئاژەڵە سەرگەردانەکان هەیە ئەویش یان وازیان لێ بهێندرێت لەناو شارەکاندا زیاد بکەن کە ئەوەیش هەم لەڕووی تەندرووستییەوە رەت کراوەتەوە و هەمیش لە رووە شارستانییەکەوە نەگونجاوە و رێگەی دووهەم کارەساتی دەرمانخۆرکردن و کوشتنیانە بە فیشەک.

هۆشیار ئیسماعیل وەک بڕیاردەری لیژنه‌ی ژینگه‌ و ته‌ندروستی دەڵێ، سبه‌ی له‌سه‌ر داوای راپۆرتی "وشه"‌ نووسراو ئاراسته‌ی ڤێته‌رنه‌ری سلێمانی ده‌كه‌ین بۆ ئه‌وه‌ی كاری رژد له‌سه‌ر ئه‌و بابه‌ته‌ بكات، چونكه‌ له‌ سلێمانی بڵاوبوونه‌وه‌ی سه‌گی به‌ره‌ڵا زۆر بووه ‌و گرفت و كێشه‌یان بۆ هاووڵاتییان دروست كردووه‌.

وشه‌ چه‌ندینجار پێوه‌ندی به‌ ڤێته‌رنه‌ری شاره‌كه‌وە كرد، به‌ڵام وه‌ڵامی پێوه‌ندییه‌كانیان نه‌دایه‌وه‌.

سلێمانی/ هۆشیار عه‌لی



وشە - هیدایه‌ت جان


PM:02:17:13/05/2019




ئه‌م بابه‌ته 157 جار خوێنراوه‌ته‌وه‌‌