خامنەیی: بۆ دروستكردنی چەكی ئەتۆم یۆرانیۆمی پێویستمان لەبەردەستە

ئێران ئاڵنگاری دژ بە كۆمەڵگەی نێودەوڵەتی رادەگەیانێت و دەڵێ، پیتاندنی یۆرانیۆم بۆ ئاستی دروستكردنی چەكی ئەتۆم كارێكی هێندە زەحمەت نییە. رابەری كۆماری ئیسلامیش دەڵێ، تەنیا قۆناغی یەكەم زەحمەتە ئەوەی تری كارەكە ئاسانە.

ئەمڕۆ پێنجشەم 15ی ئایار، عەلی خامنەیی رابەری كۆماری ئیسلامی ئێران ئاڵنگاری دژ بە كۆمەڵگەی نێودەوڵەتی راگەیاند كاتێك گوتی "پیتاندنی یۆرانیۆم بۆ ئاستی بەرهەمهێنانی چەكی ئەتۆم كارێكی ئەستەم نییە بۆ ئێران".

خامنەیی هێمای بۆ ئەوە كرد كە تەنیا رێژەی 20% بەشە قورسەكەی پیتاندنی یۆرانیۆمە، ئەوەی تری تەنیا كۆمەڵێك هەنگاوی سادەن كە دەبێت تەواو بكرێت بۆ گەیشتن بە یۆرانیۆمی ئامادە كراو بۆ چەكی ئەتۆم.

ئاژانسی "ئەسوشیتد پرێس" لە رۆژنامەی "ئێران"ی حكوومی بڵاوی كردەوە كە خامنەیی شەوی رابردوو لەگەڵ چەند بەرپرسێك لە تاران دیداریان هەبووە، لەوێدا ئاڵنگاری دژ بە دنیا راگەیاندووە كە ئەمەش هاوكاتی بەرزتر بوونەوەی ململانێ و گرژییەكانی نێوان ئەمەریكا و ئێرانە كە ئەمەریكا هێزێكی زۆر و زەبەلاحی رەوانەی رۆژهەڵاتی ناوەڕاست نەكردووە.

هەوڵەكانی ئێران بۆ پیتاندنی یۆرانیۆم و بەرز كردنەوەی ئاستەكەی لە كاتێكدایە هەفتەی رابردوو تاران 60 رۆژی مۆڵەت بە وڵاتانی ئەوروپی دابوو كە لە بەشێك لە پابەندییەكانی رێككەوتنەكە چیتر پابەند نابێت، بەڵام ئەوروپییەكان لەسەر ئەو هەنگاوە هۆشداری توندیان دایە ئێران و داوایان كرد كە پابەندی تەواوی رێككەوتنەكە بن.

بەپێی رێككەوتنی ناوەكی وڵاتانی پێنج كۆ یەك لەگەڵ ئێران، ئەوا تاران بۆی هەبوو تا 3.67% پیتاندنی یۆرانیۆم بەرز بكاتەوە، بەڵام دوای كشانەوەی ئەمەریكا ئێستە هەوڵی بەرزكردنەوەی بۆ 20% دەدات كە قۆناغێكی زۆر پێشكەوتووە بۆ گەیشتن بە یۆرانیۆمی پێویست بۆ دروستكردنی چەكی ئەتۆم.


وشە - فه‌رمان سادق


PM:05:39:15/05/2019




ئه‌م بابه‌ته 393 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌