باڵی قۆرخكاری یه‌كێتی به‌ناوی ئه‌نجوومه‌نی سه‌ركردایه‌تی راگه‌یه‌نراوێكیان بڵاو كرده‌وه‌

لە راگەیەندراوەکەی ئەنجوومەنی سەرکردایەتی یەکێتی (کە ناوەندی بڕیار بەشداری تێدا نەکرد) هاتووە، دوا توانا بخرێتە كار لەگەڵ دەوڵەتانی جیهان‌و ناوچەكە، بۆ دەستەبەركردنی مافە دیموكراسییەكانی نەتەوەكەمان، لەكاتی مۆركردنی هەر رێككەوتنێكی نێودەوڵەتی‌و ئیقلیمی.
دووەم: لەهەموو بەشێكی كوردستاندا، دیالۆگی بەرپرسانە لەنێوان هێزە كوردستانییەكان، بۆ چارەسەر كردنی كێشەكان لەلایەك‌و لایەكی دیكەشەوە، بۆ رێككەوتنی سیاسی هێزە كوردستانییەكان‌و هێزە دیموكرات‌و نیشتمانییەكانی وڵاتانی ناوچەكە، لەسەر ئامانجە هاوبەشەكان، ئەنجام بدرێ‌.
لە درێژەدا دەڵێت، بڕگەی بەستنی كۆنگرەش، كە هەستیارە و گەلێ‌ كاتی بەسەرچووە، دیسا دواخرا بۆ دوای سەرەنجامی هەوڵەكان بۆ چارەسەری كێشەكانی هەڤاڵانی ناو یەكێتیی.

راگەیەندراوی كۆبوونەوەی ئەنجومەنی سەركردایەتی یەكێتیی

گەلی خۆڕاگری كوردستان!
هەڤاڵانی یەكێتیی!

لەدۆخێكی سەختی كراوە بەڕووی ئەگەری سیاسی جۆراوجۆری جیهانی، ئیقلیمی، عیراقی‌و كوردستانیدا، ئەنجومەنی سەركردایەتی یەكێتیی، لەبارەگای مەكتەبی سیاسی لەسلێمانی، كۆبۆوە. لەكۆبونەوەكەدا، پێشهاتە نێودەوڵەتی‌و ئیقلیمی‌و ناوخۆییەكانی عیراق‌و كوردستان، وەكو دەروازەی هەڵسەنگاندنی رووداوەكان، گفتوگۆیەكی هەمەلایەنەیان لەسەركراو سەرەنجام، كۆبوونەوە گەیشتە ئەو بۆچوونەی كە:
سیاسەتی نێودەوڵەتی دەوڵەتانی ئەندامی هەمیشەیی ئەنجومەنی ئاسایش، سەبارەت بەكێشە ئابوریی‌و سیاسییەكانی جیهان، ناكۆكی قوڵ لەنێویاندا هەیە؛ ناكۆكییەكانیش لەسەر رۆژهەڵاتی ناوەڕاست، بەتایبەتی لەسەر سوریاو عیراق، هەروەها سەبارەت بەوڵاتانی تری ناوچەكە، گەیشتۆتە رۆخی دۆخی مەترسیداری عەسكەریی‌و سازشی سیاسی. كە سەرەنجامەكەی ئەگەر كێشەكان چارەسەر نەكرێن، قوربانییەكی بێڕادەی خەڵكی ناوچەكەو داڕمانی ئابوریی‌و، دەیان ملیۆن ئاوارەو، وێران كردنی شارو دێهاتی زۆرێك لەوڵاتانی ناوچەكەیە. دۆخێكی سیاسی‌و ناكۆكی بەرژەوەندی ستراتیژی ئاوها، بێگومان، سەبارەت بەچارەنوسی نەتەوەی كوردو گەلانی بێبەشكراو لەمافی دیموكراسی ناوچەكەو لەبەشەكانی كوردستاندا، مایەی مەترسییە. بەتایبەتی، هێشتا لەكۆنگرە نێودەوڵەتییەكان‌و دانوستانە نیشتمانییەكاندا، دەستەبەری بەدیهێنانی مافەكانی كوردو گەلانی دیكە، لەئارادا نییە. باكورو رۆژئاوای كوردستان، نمونەی دیارن لەم بارەوە.
هەر لەمكاتەدا، كاتێك، هەڵوێستە لەسەر دۆخی لێكترازاوی ناوخۆی هێزە كوردستانییەكانی بەشەكانی كوردستان‌و كێشە چارەسەر نەكراوەكانی پەرلەمان‌و حكومەت‌و قەیرانی ئابوری هەرێمی كوردستان دەكرێ‌، مەترسییەكان، لەم هەلومەرجەدا زیاتر ترس دەخاتە سەر ئاسۆی هاوكێشەو روداوەكان. بۆیە، ئەركی بە پەلەی سەركردایەتی سیاسی كوردستان ئەوەیە، كە:
یەكەم: دوا توانا بخرێتە كار لەگەڵ دەوڵەتانی جیهان‌و ناوچەكە، بۆ دەستەبەركردنی مافە دیموكراسییەكانی نەتەوەكەمان، لەكاتی مۆركردنی هەر رێككەوتنێكی نێودەوڵەتی‌و ئیقلیمی.
دووەم: لەهەموو بەشێكی كوردستاندا، دیالۆگی بەرپرسانە لەنێوان هێزە كوردستانییەكان، بۆ چارەسەر كردنی كێشەكان لەلایەك‌و لایەكی دیكەشەوە، بۆ رێككەوتنی سیاسی هێزە كوردستانییەكان‌و هێزە دیموكرات‌و نیشتمانییەكانی وڵاتانی ناوچەكە، لەسەر ئامانجە هاوبەشەكان، ئەنجام بدرێ‌.
لەسەر دۆخی عیراق؛ كۆبوونەوە، لەكاتێكدا ئومێدەوارە بەكەمترین زیانی پێشمەرگەو سوپای عیراق، موسڵ‌و حەویجەو ناوچەكانی تر ئازاد بكرێ‌، لەهەمانكاتدا، بەپێویستیزانی بەشداری هێزی پێشمەرگە لەم شەڕە چارەنوسسازانەدا، بەپێی بەرنامەیەكی سیاسی‌و ئیداریی‌و خزمەتگوزاری دوای رزگاركردنی ناوچەكان، دوور لەهەر چەشنە فشارێكی نابەجێ‌ بەرامبەر دانیشتوانی رەسەنی ناوچەكان بێ‌. بەتایبەتی ئەگەری قوڵكردنی كێشەی نێوان شیعەو سوننە، لەئارادایە! هەروەها مەترسی پێشێلكاری زیاتر بەرامبەر مەسیحی‌و ئێزدی‌و شەبەك‌و توركمان، نادیدە ناگیرێ‌.
هەلومەرجێكی گونجاویشە، دوای سەردانی وەفدی باڵای هەرێمی كوردستان بەسەرپەرشتی بەڕێز مەسعود بارزانی بۆ بەغداد، وەفدی باڵای حكومەتی هەرێم، بەپرۆژەی نوێی دانوستاندن، بگەنە بەغدادو گفتوگۆیەكی بەرپرسانە لەهەرێم‌و بەغداد بۆ چارەسەری راستەقینەی كێشەكان بكرێ‌. لەپێشەوەدا چارەسەری بودجەو موچە، ئینجا كەیسی نەوت‌و گاز. بەمەرجێ‌ مافی ئابوری گەلەكەمان، بهێنرێتەدی.
پەیوەست بەم كەیسە، كۆبوونەوە، بۆ زانینیی سەرجەم راستییەكان لەسەر قەیرانی دارایی‌و نەوت‌و داهات‌و سەرفەكەی.. هەروەها بۆ ساغكردنەوەی ئەو پڕوپاگەندانەی لەسەر هەناردەكردنی كاروانی تەنكەری نەوتی كەركوك‌و پاڵاوگەكانی دیكە، بۆ بەغداد، توركیاو ئێران‌و هەر داهاتێكی ناشەرعی (ئەگەر لەئارادابێ‌)، لیژنەی پێكهێنراوی پێشوی یەكێتیی راسپێردرا، دوا توانای خۆی لەم بارەیەوە بخاتەكار، بۆ ئەوەی راستییەكان‌و پڕوپاگەندەكان، یەكاڵا بكرێنەوە‌و رای گشتیش لەسەر وردەكارییەكان، ئاگادار بكرێت.

جەماوەری دڵسۆزی كوردستان!

سەركردایەتی یەكێتیی، لەكۆبوونەوەكەدا جەختیكردەوە، كە هێزی پێشمەرگەو قوربانییەكانی بونەتە مایەی شانازی گەورەی نەتەوەی كوردو ئازادیخواز‌و پشتیوانەكانمان. هاوكاری عەسكەری لەلایەن وڵاتە دۆستەكانی هاوپەیمانی ستراتیژی دژی داعش‌و پشتیوانانی ناوچەكەش، بۆ تێكشكاندنی تیرۆریستە رەشەكوژو ئەقڵ كوژەكان، بەڵگەی بەردەوامی دۆستایەتی گەلەكەمان‌و حكومەتی هەرێم‌و هێزی پێشمەرگەن، بەڵام لەهەمانكاتدا، كارا نەكردنەوەی پەرلەمان‌و چارەسەرنەكردنی كێشەی نێوان لایەنە سیاسییەكان‌و تەنگوچەڵەمەكانی حكومەت؛ بەتایبەتی ئەنجامنەدانی گۆڕانكاری ریشەیی لەسیستەمی حوكمڕانی‌و ریشەكێش نەكردنی گەندەڵی‌و كۆتایی نەهێنان بەمشەخۆریی‌و چارەسەر نەكردنی ئاستەنگی موچەی فەرمانبەران‌و كرێكاران..تاد، ئەمانە تێكڕا، دۆستانیشمانی وەكو گەلەكەمان نیگەران كردووە. بۆیە، سەرەڕای هەندێك چاكسازیی لەكاروباری حكومەت‌و بڕینی موچەی بندیوارو كەمكردنەوەی مەسرەفی حكومەت، پەسەندكردنی پرۆژەی سیستەمی ئەلیكترۆنی بانكی‌و هەوڵەكانی چاكسازی؛ هێشتا، قەیرانی ئابوریی‌و سیاسی‌و سیستەمی حوكمڕانی بەردەوامە: بودجەو موچە دابین نەكراوە؛ گۆڕانكاری لەسیستەمی حوكمڕانی زۆری ماوە؛ سیستەمی بانكی‌و لەبانكەكاندا هەڵگرتنی پاشكەوتی خەڵك، زۆر لاوازە. تەنانەت هۆیە راستەقینەكانی قەیرانی داراییش، جگە لەزۆرو زەبەندی موچەخۆر، كە زیانەكەی زەقە، بەڵام هۆكارە كەڵەكەكراوەكانی كابینەكانی پێشووش لەم قەیرانەو لەم گەندەڵی‌و مشەخۆرییە، هێشتا لای رای گشتی، تەنانەت لای پسپۆرانی دارایش، نادیارن. كە بەداخەوە، رای گشتی، تەنها حكومەتی ئێستای خستۆتە ژێر باری كێشەكان!!
یەكێتی، وەكو هەمیشە، چ لەڕێگەی نوێنەرەكانی لەحكومەتداو چ لەڕێی سەنگی سیاسی خۆیەوە، لەلایەكەوە ئەوپەڕی پەرۆشە بۆ چارەسەركردنی كێشەی موچەو تەنگوچەڵەمەكان‌و پشتیوانی خەباتی پیشەیی- مەدەنیانەی خەڵكە. لەهەمانكاتیشدا، پەرۆشە حكومەتی كوردستان، بەرنامەیەكی چاكسازیی هاوچەرخی، لەم قۆناغەدا هەبێ‌‌و سەركەوتووش بێ‌‌و بۆ سەركەوتنیشی، لەبەر هیچ فشارێكی لاوەكی، سیاسەتی مێژوویی یەكێتیی لەراپەڕاندنی ئەركە نەتەوەیی‌و دیموكراسییەكانی بەرامبەر خەڵك‌و نیشتمان، ناداتە دەست قەدەری هەڵچون‌و داچوون. یان لەكاتی قەیران‌و كێشەدا، لەبەرپرسیارێتی دوور بكەوێتەوە. یەكێتیی‌و یەكێتییەكان، لەكاتی تەنگانەو تەنگوچەڵەمەدا، سەنگەر‌و مەیدان چۆڵ ناكەن.
لەم بارەیەوە، سیاسەتی یەكێتیی لەپارێزگاكانی هەرێم، تایبەت لەسلێمانی‌و پایتەختی كوردستان، ئینجا لە كەركوك، خانەقین، شەنگال‌و باقی ناوچەكانی دەرەوەی هەرێم، هەمیشە رون بووەو لێكدانەوەی پڕ لەكاردانەوەی ئەملاوئەولا، بەرامبەر سیاسەتی یەكێتی، پڕوپاگەندەی كاتییەو هیچی دیكە.

هەڤاڵانی یەكێتیی!

تەوەرێكی دیكەی كۆبوونەوە، كە بەوپەڕی هەست بە بەرپرسیارێتی لەناو هەڤاڵاندا باسكرا، كێشەكانی ناو یەكێتییە. دوور لەوەی بچینە ناو وردەكاری دەسەڵاتەكانی پەیڕەوی ناوخۆ، كە لەم بارەوە دەقی دەسەڵاتەكان‌و ماوەی جێبەجێكردنیان رۆشنە، كۆبونەوە جەختیكردەوە، كە:
دەرگای دیالۆگی هەڤاڵانە، بۆ چارەسەری كێشەی هەڤاڵانمان، كراوەیە. بەدڵنیاییەوە، چی توانامان مابێ‌، دەیخەینەكار بۆ كۆتاییهێنانی كێشەكان‌و بوژاندنەوەی متمانەو خستنەوەگەڕی پۆست‌و ئۆرگانەكان. لەبەڕێز جێگری سكرتێری گشتییەوە، تا هەڤاڵانی مەكتەبی سیاسی‌و سەركردایەتی‌و ئۆرگانەكانی دیكە.
لەبەر بەرژەوەندی یەكێتیش، بڕیاردرا، تەنانەت وەڵامی سەرجەم ئاخاوتن‌و رونكردنەوەو رەخنەكانیش لەمەڕ كێشە ناوخۆییەكان‌و چۆنییەتی ئەنجامدانی كۆبوونەوەی مەكتەبی سیاسی‌و سەركردایەتی، نەدرێتەوە.
بڕگەی بەستنی كۆنگرەش، كە هەستیارە و گەلێ‌ كاتی بەسەرچووە، دیسان دواخرا بۆ دوای سەرەنجامی هەوڵەكان بۆ چارەسەری كێشەكانی هەڤاڵانی ناو یەكێتیی.
لەكۆتاییشدا.. كۆبوونەوە بڕیاریدا، لەمەودوا، مانگی (3)جار كۆبوونەوەی مەكتەبی سیاسی ئەنجامبدرێ‌. لەكاتی خۆشیدا، دوو مانگ جارێ‌ ئەنجومەنی سەركردایەتی كۆدەبێتەوە. كۆبوونەوەی ئاییندەی سەركردایەتیش، لەدوای هەوڵی چارەسەركردنی كێشە ناوخۆییەكان، كە ئومێدەوارین لەم بارەوە سەركەوتووبین، لەهەفتەیەك بۆ دوو هەفتەی تر، بڕیاردرا بە سەرپەرشتی بەڕێز جێگری سكرتێری گشتی هەڤاڵ كۆسرەت رەسوڵ، ئەنجامبدرێ‌.
بۆ ئەوەی كۆبونەوەكانیش، لەڕاپەڕاندنی ئەركە حزبییەكانیاندا سەركەوتووبن، بڕیارە، ئۆرگانەكانی یەكێتیی كارا بكرێنەوە، سەرپەرشتی بكرێن، چالاكی بنوێنن. دوا تواناش بۆ چارەسەری كێشەی دارایی هەڤاڵ‌و ئۆرگانەكانی یەكێتیی، بەپێی پرۆژەیەكی نوێ‌، بخرێتە كار.

ئیتر بۆ پێشەوە بەرەو

-پاراستنی یەكێتیی ناو یەكێتیی
-چارەسەركردنی كێشەی بودجەو موچەی كوردستان‌و خەڵك
-تێكشكاندنی داعش.. لەڕوی عەسكەریی‌و كۆمەڵایەتییەوە
-خۆ سازدان بۆ چوارەمین كۆنگرە



ئەنجومەنی سەركردایەتی
یەكێتیی نیشتمانیی كوردستان
(15)ی تشرینی یەكەمی (2016)

وشە/ ر.م