لە سلێمانی هێشتا رەوشی تەناهیی خراپە و دەنگۆی بوونی گرووپی تیرۆرستی و گرتنیان لەلایەن دەزگای هەواڵگری عێراقییەوە رەوشەكەی زیاتر خراپ كرد و خەڵكی شارەكەیشی نیگەران كردووە.
"وشە" بۆ یەكلا كردنەوەی ئەو دەنگۆیانە لەبارەی گرووپی تیرۆرستی هەیە پێوەندی بە حەسەن نووری بەرێوەبەری ئاسایشی سلێمانی كرد و ئامادەنەبوو زانیاری بدات تەنیا گوتی، دۆخی سلێمانی ئارامە و هیچ كێشەیەك نییە.
لای خۆیەوە بەرزان حەمید سەرۆكی لیژنەی ناوخۆ و ئاسایش لە ئەنجوومەنی پارێزگای سلێمانی بە "وشە"ی راگەیاند، كەموكورتی لە هێزە تەناهییەكانی سلێمانی هەیە.
روونیشی كردەوە دۆخی سلێمانی لە ڕووی تەناهییەوە جێگیر نییە و پێویستە لەلایەن دەزگا تەناهییەكانەوە پلانی وردی بۆ دابنرێ.
هەروەك دووپاتی لەوەیش كردەوە كە ئەو رووداوانەی لە رابردوو لە سلێمانی رووی دا جێگای پرسیارە و پێویستە دەزگا تەناهییەكان روونكردنەوەی پێویستیان بۆی هەبێت.
ئەوە لەكاتێكدایە لەماوەی ڕابردوو چەندان باندی تاوانكاری لە سلێمانی گیرابوون و ددانیان بە چەندان تاوانی گەورەدا نا.
سلێمانی/ هۆشیار عەلی