بڕیارە سبەی مووچەی وەزارەتێك و كەمئەندامانی کوردستان بۆ مانگی ئادار دابەش بكرێت.
ئەمڕۆ سێشەم 11ـی حوزەیران، بەڕێوەبەرایەتی گشتی چاودێری و گەشەپێدانی كۆمەڵایەتی گەرمیان بڵاوی كردۆتەوە، سبەی چوارشەم مووچەی وەزارەتی كارو كاروباری كۆمەڵایەتی حكوومەتی هەرێمی كوردستان دابەش دەكرێت.
زیاتر ڕوونكراوەتەوە، سبەی مووچەی كەمئەندامانیش دابەش دەكرێت.
وەزارەتی دارایی و ئابووری پێش جەژن مووچەی وەزارەتی پێشمەرگە و وەزارەتی پەروەردەی دابەش كرد بۆ مانگی ئاداری ساڵی 2019.
بەپێی ڕێككەوتنی نێوان هەرێمی كوردستان و عێراق لە ناوەڕاستی هەر مانگێك عێراق بڕی 452 ملیار دینار بۆ هەرێمی كوردستان دەنێرێت و بە داهاتی ناوخۆی و پارەی هاوپەیمانان بۆ پێشمەرگە و فرۆشتنی نەوت مووچەی فەرمانبەران دەدرێت.
لە سەرەتای ئەمساڵ پاشكەوتی مووچە لەسەر مووچەی فەرمانبەرانی هەرێمی كوردستان هەڵگیراوە و پێدانی مووچە ئاسایی بووەتەوە لە پێنجی سەرەتای هەر مانگێك لە هەرێمی كوردستان مووچە دابەش دەكرێت.