بەرەبەیانی ئەمڕۆ بومەلەرزەییەك شارۆكەی كۆیەی سەر بە پارێزگای هەولێری هەژاند و هاووڵاتیان هەستیان پێ كردووە.
ئەمڕۆ دووشەم 17ـی حوزەیران، لە ڕاگەیەندراوێكی بەڕێوەبەرایەتیی گشتیی كەشناسی و بومەلەرزەزانیی هەرێمی كوردستان هاتووە، لە شارۆكەی كۆیە بومەلەرزەیەك بە گوڕی 3.1 پلە بەپێوەری رێكختەر رووی داوە.
بەڕێوەبەرایەتیی كەشناسی و بومەلەرزەزانی هەرێمی كوردستان ڕای گەیاندووە، سەعات پێنج و 44 خولەكی بەیانیی ئەمڕۆ بەكاتی هەولێر بومەلەرزەیەك بەگوڕی 3.1 پلە بەپێوەری رێكختەر تۆمار كراوە.
ئەوەش ڕوون كراوەتەوە، بوومەلەرزەكە بە قوڵایی هەشت كیلۆمەتر بە دوری 22 كیلۆمەتر لە دووری كۆیە رووی داوە و لە چەند شوێنێك هەستی پێ كراوە.
ڕوودانی ئەو بومەلەرزەیە و تۆماركردنی لە شارۆكەی كۆیە لە كاتێكە هەرێمی كوردستان ناكەوێتە سەر هیچ هێلێكی بومەلەرزە و ساڵی 2017 كۆمەڵێك بومەلەرزە ڕوویدا بەوهۆیەوە ژمارەیەك هاووڵاتی بوونە قوربانی و ژمارەیەكیش برینداربوون.
شارۆكەی كۆیە بە دووریی 71 كیلۆمەتر دەكەوێتە باكووری ڕۆژهەڵاتی هەولێر و ژمارەی دانیشتوانی 119 هەزار هاووڵاتیە.